ZAGGOLE – ዛጎል

“Our true nationality is mankind.”H.G.

በቆሼ በደረሰው አደጋ ለተጎጂ ቤተሰቦች የቤት መስሪያ ቦታና 1 ሚሊየን ብር ሊሰጣቸው ነው

በቆሼ በደረሰው አደጋ ተጎጂ የሆኑ ቤተሰቦችን በዘላቂነት ለማቋቋም አንድ ሚሊየን ብር የቤት ግምት ካሳን በቤተሰብ ደረጃና የለማ የቤት መስሪያ ቦታ እንዲሰጥ ከስምምነት መደረሱ ተነግሯል።

መጋቢት ሁለት በአዲስ አበባ ቆሼ ተብሎ በሚጠራው ቦታ የደረሰውን አደጋ ተከትሎ፥ ተጎጂዎችን በጊዜያዊነት የመደገፍና በዘላቂነት የማቋቋም ስራ በህዝቡና በመንግስት በኩል እየተሰራ ይገኛል።

በዘላቂነት ጉዳት የደረሰባቸውን መልሶ ለማቋቋም በሚደረገው እንቅስቃሴ ውስጥም መንግስት፣ መንግስታዊና መንግስታዊ ያልሆኑ ተቋማት፣ ባለሃብቶች እና መላው የኢትዮጵያ ህዝብ ድጋፍ እያደረጉ ይገኛል።

Related stories   በምናለሽ ተራ ገበያ – ከሰኞ እስከ እሁድ

ተጎጂዎችን በዘላቂነት ለማቋቋም መንግስት በገባው ቃል መሰረት የአዲስ አበባ ከተማ አስተዳደር ከተጎጂዎች ከተውጣጣ ኮሚቴ ጋር ሲወያይ ቆይቷል።

በአደጋው ቤተሰቦቻቸውን ያጡትና የኮሚቴው አባላትም በውይይቱ ሂደት ከስምምነት ላይ የተደረሰባቸው ውሳኔዎች ከጠበቁት በላይ መሆኑን ተናግረዋል።

ስምምነቱ የቤት ግምት ካሳ፣ የለማ ምትክ ቦታ ስጦታ (ጀሞ አካባቢ)፣ በአደጋው የተጎዱትን ቤተሰብ መስርተው የሚኖሩ ቤተሰቦችንና ተከራዮችንም የተመለከተ መሆኑንም ገልጸዋል።

Related stories   የዓለም ጤና ድርጅት ለቻይናው ክትባት ይሁንታውን ሰጠ

አስተዳደሩ ከኮሚቴው ጋር ባደረገው ውይይት፥ በቀጣይ ቤት ተገንብቶ ነዋሪዎቹ ወደ ራሳቸው ቤት እስከሚገቡ ድረስ ህይወታቸውን ለሚገፉበት የኪራይ ቤት ገንዘብ መክፈልንም ያካትታል።

ከዚህ ባለፈም ጉዳት በደረሰባቸው ቤቶች ተከራይ የነበሩ ነዋሪዎች የ10/90 የጋራ መኖሪያ ቤቶች በኪራይ የሚያገኙ ይሆናል። የኮሚቴ አባላቱ እንዳሉት በአደጋው የወደመው ንብረት ካሳ ጉዳይም በቀጣይ የሚሰራበት ይሆናል።

የከተማ አስተዳደሩ አደጋው ከደረሰበት ጊዜ አንስቶ በአጭርና ረጅም ጊዜ ተጎጂዎች የሚረዱበት ስልት እና አቅጣጫ ቀይሶ እየሰራ መሆኑን የአዲስ አበባ የመንግስት ኮሙዩኒኬሽን ቢሮ ገልጿል።።

Related stories   የበልግ ዝናብ በአንዳንድ አካባቢዎች ጎርፍ ሊያስከትል ስለሚችል ጥንቃቄ ማድረግ እንደሚገባ ተገለፀ

በአጭር ጊዜ ተጎጂዎች ባሉበት ቦታ መሰረታዊ ፍላጎቶች የማሟላት ጉዳይ በመንግስትና በህብረተሰቡ እየተሰራ ሲሆን፥ አሁንም በዛው መንገድ እንደቀጠለ ይገኛል።

በአደጋው ጉዳት ለደረሰባቸው ተጎጂዎች እስካሁን ከ76 ሚሊዮን ብር በላይ ሲሰበሰብ፥ በአይነት የተደረገው ድጋፍ ከ5 ሚሊየን ብር በላይ ደርሷል።

 (ኤፍ ቢ ሲ)

በደመቀ ጌታቸው