የውጭ የሎጂስቲክስ ኩባንያዎች እንዲገቡ መፈቀዱ አያሳስብም ብሏል

የድርጅቱ ዋና ሥራ አስፈጻሚ አቶ ሮባ መገርሳ ለሪፖርተር እንደገለጹት፣ የገቢና የወጪ ንግድ የጭነት አገልግሎት ለመስጠት ድርጅቱ ያሉት መርከቦች ውስን በመሆናቸው የኤርትራን መርከቦች በኪራይ ወስዶ በባህር ትራንስፖርት ያለውን የገበያ ድርሻ ለማስፋፋት እየተቀንቀሳቀሰ ይገኛል፡፡

እንደ ኢትዮጵያ ሁሉ ሌሎች አገሮች ኩባንያዎች ለኤርትራ መርከቦች ተመሳሳይ ፍላጎት ስላላቸው፣ በጨረታው መሳተፋቸውን ዋና ሥራ አስፈጻሚው አስታውቀዋል፡፡

‹‹ድርጅቱ በዋጋም ሆነ በመርከቦቹ አጠቃቀም አስተማማኝና የተሻለ ሰነድ ያስገባ በመሆኑ ጨረታውን እንደምናሸንፍ ጥርጥር የለኝም፤›› ሲሉ አቶ ሮባ ገልጸዋል፡፡

ድርጅቱ በዓለም አቀፍ ገበያ ድርሻው በጣም ውስን መሆኑን፣ የኢትዮጵያ ብቻ እንኳ ሲታይ በገቢ ንግድ ያለው ድርሻ ከ15 በመቶ እንደማይበልጥ፣ በወጪ ንግድ ደግሞ ምንም እንደሌለው ዋና ሥራ አስፈጻሚው ለአብነት ጠቁመዋል፡፡

ድርጅቱ በባህር ትራንስፖርት ዕቃ ከማጓጓዝ ይልቅ በአገር ውስጥ የየብስ ትራንስፖርት የተሻለ መሆኑን፣ ድርሻውም እስከ 66 በመቶ መድረሱን አስረድተዋል፡፡

ድርጅቱ አሁን ካለበት ደረጃ በተሻለ የወጪ ንግድ ዕቃዎችን የሚያጓጉዙና እንደ ነዳጅ ዓይነት የፈሳሽ ውጤቶችን የሚይዙ ኮንቴይነር ተሸካሚ መርከቦች ስለሚያስፈልጉት፣ የኤርትራን መርከቦች ተረክቦ አገልግሎቱን ለማሳደግ ጥረት እየተደረገ መሆኑን አቶ ሮባ አስታውቀዋል፡፡

‹‹የኤርትራ መርከቦች ለእኛ የገቢ ንግድ ዕቃዎች በሚገባ ተስማሚ ናቸው፤›› ሲሉም አክለዋል፡፡

አሁን ባለው የዓለም ገበያ በመርከብ የትራንስፖርት አገልግሎት አዳዲስ ኩባንያዎች እየገቡ ስለሆነና ነባሮቹም በራሳቸው መንቀሳቀስ ባለመቻላቸው፣ ከሌሎቹ ጋር በመዋሀድ ከገበያው ላለመውጣት ሲታገሉ ይታያል፡፡ አንዳንዶች ደግሞ ከገበያው ውጪ ይሆናሉ፡፡

አነስተኛ ቁጥር ባላቸው መርከቦች ብቻ በገበያ መቆየት ስለማይቻል፣ በኪራይ መርከቦች መሥራት የተለመደ መሆኑንም አቶ ሮባ አስረድተዋል፡፡

በተያያዘ ዜናም ዋና ሥራ አስፈጻሚው ለሪፖርተር እንደገለጹት፣ የኤርትራ አስመጪዎች በኢትዮጵያ መርከቦች ለመስተናገድ ፍላጎታቸውን እየገለጹ ነው፡፡

‹‹በእነሱ በኩል ያለውን የገበያ ሁኔታ በደንብ ዓይተናል፡፡ ፍላጎታቸውን የገለጹልንን ያህል እኛም ፍላጎቱ አለን፤›› ያሉት ዋና ሥራ አስፈጻሚው፣ ‹‹ነገር ግን ተጨማሪ የገበያ አዋጭነት ጥናት የሚያስፈል በመሆኑ ለተጨማሪ ስምምነት ድርድር ይጠይቃል፡፡ እኛም የዚያን ያህል እየተዘጋጀን ነው፤›› ብለዋል፡፡

ይህ በእንዲህ እያለ የኢትዮጵያ ኢንቨስትመንት ቦርድ ባለፈው ሳምንት ለአገር ውስጥ ብቻ ተከልሎ የቆየውን ዕቃዎችን የማሸግ፣ የማስተላለፍና የመረከብ ውክልና አገልግሎቶችን ለውጭ ባለሀብቶች መፍቀዱ፣ የድርጅቱን አቅም እንደሚያሳድግለትና ከሥጋት ይልቅ መልካም አጋጣሚ እንዳለው ዋና ሥራ አስፈጻሚው ገልጸዋል፡፡

‹‹ዓለም አቀፍ የሎጂስቲክስ ኩባንያዎች ከእኛ የተሻለ አቅም ስላላቸው፣ ይዘውት የሚመጡት ልምድ የእኛንም አቅም የሚያሳድግ ስለሚሆን ትክክለኛ ውሳኔ ነው፤›› ሲሉ ውሳኔውን መቀበላቸውን ተናግረዋል፡፡

‹‹ውሳኔው ወደፊት ወደ ግል ይዞታነት ለመዘዋወር የሚደረገውን ዝግጅት የሚያግዝ ነው፤›› ያሉት አቶ ሮባ፣ ድርጅታቸው ከሌሎች የውጭ ኩባንያዎች ጋር በአጋርነት ወይም በሽርክና ለመሥራት መንገድ ይከፍትለታል ሲሉም ጠቁመዋል፡፡

Share and Enjoy !

0Shares
0

Leave a Reply

Your email address will not be published. Required fields are marked *