ምስል – ዶክተር ይናገር 

ባንኮች ተንቀሳቃሽ ንብረትን በዋስትና በመያዝ ማበደር የሚያስችላቸው መመሪያ ተዘጋጅቶ ለማፅደቅ በሂደት ላይ መሆኑን የኢትዮጵያ ብሔራዊ ባንክ አስታወቀ። በአገሪቱ የሚገኙ የግል ባንኮች ከዚህ ቀደም ብድር ለሚፈልጉ አካላት የሚያበድሩት ቋሚ ንብረትን በዋስትና በመያዝ እንደሆነ ይታወቃል። በቀጣይ ግን ዜጎች ተንቀሳቃሽ ንብረትን በዋስትና በማስያዝ ብድር እንዲያገኙና የፋይናንስ ችግራቸውን መቅረፍ እንደሚችሉ ታምኖበታል።

ከዚያም ባለፈ ቋሚም ሆነ ተንቀሳቃሽ ንብረት የሌላቸው ግን አዳዲስ የፈጠራ ሃሳብ ያላቸው ዜጎችም የፈጠራ ሃሳቡን በዋስትና በማስያዝ ብድር የሚያገኙበት አሰራር ለመዘርጋት መታቀዱንም የብሔራዊ ባንክ ገዢው ዶክተር ይናገር ደሴ ተናግረዋል።

ከዚህም ባለፈ ባለፉት ሰባት ወራት ያለስራ ያሉና አሳሪ የሆኑ 10 መመሪያዎችን ያሻሻለው ብሔራዊ ባንኩ፥ ሶስት ረቂቅ አዋጆችን ለማስፀደቅ በሂደት ላይ መሆኑን የባንኩ ገዢ ተናግረዋል።

የባንኮች ማሻሻያ አዋጅ ላይም በውጭ አገር የሚኖሩ ኢትዮጵያውያንና ትውልደ ኢትዮጵያውያን በኢትዮጵያ የፋይናንስ ዘርፍ ተሳታፊ መሆን የሚያስችላቸው ማሻሻያም ተካቶበታል።

ማሻሻያው ከሚመለከታቸው አካላት ጋር ውይይት ከተካሄደበትና ከታመነበት በኋላም ፀድቆ ተግባራዊ እንደሚደረግ ተነግሯል።

በውጭ አገር ያሉ ኢትዮጵያውያን ዳያስፖራዎች ውስጥ በተለይም ከሃዋላ ጋር በተያያዘ ህገ ወጥ አሰራሮችን የሚከተሉ በመኖራቸው በአገሪቱ የፋይናንስ ዘርፍ ውስጥ ተሳትፎ እንዲኖራቸው ቢደረግ መሰል ህገ ወጥነትን መከላከልና ከሃዋላ የሚገኘውን ገቢም ለማሳደግ እንደሚያግዝ ነው የታመነበት።

ከሃዋላ ጋር በተያያዘ አሁን ላይ የአገሪቱ ቀዳሚ የውጭ ምንዛሪ ማግኛ መንገድ እየሆነ በመምጣቱ ከዚህም በላይ ለመጠቀም አዳዲስ አሰራሮችን ተግባራዊ ለማድረግ የሚያስችሉ ስርዓቶችንም ለመዘርጋት መዘጋጀቱን ብሔራዊ ባንክ አስታውቋል።

ከኢትዮ ቴሌኮም የመነጨ አዲስ አሰራር መኖሩን የጠቆሙት ዶክተር ይናገር፥ በሞባይል የባንክ አገልግሎት/ሞባይል ባንኪንግ/  ሃዋላ ለመሰብሰብ መታሰቡን አስታውቀዋል።

ከዚህም ባለፈ ሃዋላ በቀላሉ፣ ወጪ ቆጣቢ በሆነና ፈጣን አሰራርን በመከተል መላክ እንዲችሉ የሚያስችሉ ስርዓቶችን ለመዘርጋትም ዝግጅት ተጠናቋል ተብሏል።

የአገሪቱ የውጭ ምንዛሪ መጠባበቂያ ክምችት ከሰባት ወራት በፊት ከነበረው አንጻር በቂ ነው ባይባልም መሻሻል ማሳየቱን ዶክተር ይናገር ተናግረዋል። አሁንም ግን የወጪ ንግዱ መቀዛቀዝ ከፍተኛ ስጋት መሆኑን አሰታውቀዋል።

የውጭ ምንዛሪ ተመን ላይ በባንኩ ማሻሻያ ለማድረግ አለመታሰቡን ያነሱት ገዥው፥ በጥቁር ገበያ ያለው የምንዛሪ ተመን በባንኮች ካለው ጋር ልዩነቱ እንዳይሰፋ በተቻለ መጠን የአስተዳደርና ህጋዊ እርምጃዎችን በመውሰድ ስራዎች ይከናወናሉ ተብሏል።

ለወጪ ንግድ የሚውሉ የግብርና ምርቶች አቅርቦት ማነስና የኮንትሮባንድ መስፋፋት አሁንም የወጪ ንግዱ እንዳያድግ ምክንያት መሆናቸው ተጠቅሷል።

የአገሪቱ አጠቃላይ ኢኮኖሚ የእድገት ምጣኔ ከ2008 ዓ.ም ወዲህ መቀዛቀዝ ማሳየቱን ያነሱት ዶክተር ይናገር፥ በዚህም ዓመት ባለፈው ዓመት ከተመዘገበው የ7 ነጥብ 7 በመቶ ዕድገት ጋር የሚቀራረብ ወይም የሚበልጥ ዕድገት ሊመዘገብ እንደሚችል ጠቁመዋል።

 

በባሃሩ ይድነቃቸው – ፋና ብሮድካስቲንግ

Share and Enjoy !

0Shares
0

Leave a Reply

Your email address will not be published. Required fields are marked *