የአማራ ክልል ምክር ቤት እያካሄደ ባለው ጉባኤ ከተወያየባቸው ጉዳዮች መካከል ከትግራይ በኩል ክልሉ ላይ ወረራ ለማካሄድ ዝግጅት መጠናቀቁን የተመለከተው አንዱና ዋናው ነው። የአማራ ክልል ብሄርተኛ ነን ባዮች የክልሉ ህዝብ አንድ ሆኖ ህብረት እንዳይፈጥር እላይ ታች በሚሉበት በአሁኑ ወቅት፣ የክልሉ ምክር ቤት የትግራይ ክልል ወደ ድንበር ያስጠጋውን የታጠቀ ሃይል ሙሉ በሙሉና ባስቸኳይ እንዲያነሳ ማሳሰቢያ ሰጥቷል።

በአገሪቱ የተካሄድውን ለውጥ ተከትሎ ትግራይ የመሸጉ “ወንጀለኞች” ሲል ምክር ቤቱ የገለጻቸው ክፍሎች በትግራይና በአማራ ክልል ህዝብ መካከል ምንም ዓይነት ችግር እንደሌለ አመልክቷል። በክልሉ በኩል ያለው ራስን የመከላከል ዝግጅት ምን ያህል እንደሆነ ይፋ ያላደረጉት የክልሉ የመንግሥት ኮሚዩኒኬሽን ጉዳዮች ጽህፈት ቤት ዋና ዳይሬክተር አቶ አሰማኸኝ አስረስ ” ከጦርነት ትርፍ አይገኝም” ሲሉ በሁለቱ ህዝብ መካከል ግጭት ለመቀስቀስ የሚደረገው ሩጫ እንዲቆም ጥሪ መቅረቡን አመልክተዋል።

የትግራይ ክልል መሪ ደብረጽዮን በተደጋጋሚ ህዝብ ጋሻና ጦር እንደሚሸልማቸው፣ ይህ ደግሞ አላማውና ጥሪው የሚታወቅ እንደሆነና ” ኩሩና ጀግና” ሲሉ  ያወደሱት ህዝብ በየትኛውም መስክ ድል አድራጊ መሆኑንን ሲናገሩና ንግግራቸው በጭብጨባ ሲታገዝ በምስል ታግዞ ሲሰራጭ መቆየቱ የሚታወስ ነው።

በሁለቱ ክልሎች መካከል ያለውን አለመግባባት የፌደራል መንግስት በተደጋጋሚ ለማስማማት ሙከራ ቢያደርግም ውዝግቡ ሊረግብ አልቻልም። ይልቁኑም አሁን የክልሉ ምክር ቤት በውይይት እንዳነሳው፣ የክልሉ የጸጥታው ዘርፍ ሃላፊዎች እንዳሉት በቅማንት ህዝብ ስም የተፈጸመው ወረራ፣ መፈናቀልና የንብረት ውድመት የትግራይ ክልል ውስጥ የተመሸጉ አካላት እጅ እንዳለበት ይፋ ሆኗል።

ሁለቱ ክልሎች ወደተፈራው ግጭት ቢያመሩ በትግራይ የሰፈረው የመከላከያ ሰራዊትና የፌደራል መንግስት አቋም ምን ሊሆን ይችላል የሚለው ጉዳይ የአብዛኞች መነጋገሪያ ቢሆንም፣ ክልሎቹ ጉዳዩን በሰለጠነ መንገድ ተነጋገረው ሊፈቱት እንደሚገባ የህዝብ እምነት ነው። በጉዳዩ ዙሪያ የፌደራል መንግስት በግልጽ አቋሙን ባያሳውቅም ግጭት ሊነሳ ይችላል በሚባልበት ድንበር አካባቢ ሰፊ ቁጥር ያለው ሃይል ማስፈሩን ለጉዳዩ ቅርብ የሆኑ ወገኖች አስታውቀዋል።

የአማራ መገናኛ ብዙሃን ሃላፊውን ጠቅሶ የሚከተለውን ዘግቧል። የትግራይ ክልል የአማራ ክልል ለሰጠው ማሳሰቢያ ይህ ዜና እስከታተመ ደረሰ ያለው ነገር የለም።

በአማራና በትግራይ ወንድማማች ህዝቦች ዘመን ተሻጋሪ መልካም ግንኙነት ውስጥ ልዩነት በመፍጠር ወደ ጦርነት የሚያስገባ ጸብ አጫሪነት ምንም ዓይነት ተቀባይነት እንደሌለው የአማራ ክልል ምክር ቤት አሳሰበ፡፡

በትግራይ ክልል አመራሮች በኩል የጦርነት ቅስቀሳና የሰራዊት ዝግጅቶች በአስቸኳይ እንዲቆሙ የአማራ ክልል ምክርቤት በአጽንዖት መክሯል፡፡

ባሕር ዳር፡ የካቲት 27/2011 ዓ.ም(አብመድ) የምክር ቤቱ 5ኛ ዙር፣ 4ኛ ዓመት የሥራ ዘመን 12ኛ መደበኛ ጉባኤ ከየካቲት 26 እስከ 29/2011 ዓ.ም እየተካሄደ ነው፡፡

ምክር ቤቱ ዛሬ የወሰናቸውን ዐበይት ጉዳዮች በተመለከተ የክልሉ የመንግሥት ኮሚዩኒኬሽን ጉዳዮች ጽህፈት ቤት ዋና ዳይሬክተር አቶ አሰማኸኝ አስረስ መግለጫ ሰጥተዋል፡፡

በመግለጫቸው እንደተመላከተው ከትግራይ ክልል ጋር እየተፈጠረ ያለውን የጸጥታ ሁኔታ ምክር ቤቱ በዝርዝር ገምግሟል፡፡ ሁለቱ ሕዝቦች በታሪክ፣ በባህል፣ በኃይማኖትና ሀገርን በመገንባት ዘመን ተሻጋሪ ታሪክ እንዳላቸው ምክር ቤቱ መገምገሙን አቶ አሰማኸኝ አመላክተዋል፡፡ በሁለቱ ህዝቦች መካከል ምንም ዓይነት ልዩነት፣ ጸብም ሆነ መቃቃር እንደሌለና አብረው የኖሩና የሚኖሩ መሆናቸውን ምክር ቤቱ በአጽንዖት መገምገሙንም አስታውቀዋል፡፡ ሕዝቦቹ ጥረው ግረውና ለፍተው የሚያድሩ፣ ዘመን ተሻጋሪ ግንኙነታቸው ወደፊትም የሚዘልቅ መሆኑን እምነት እንዳለው ምክር ቤቱ አቅጣጫ አስቀምጧል ነው ያሉት አቶ አሰማኸኝ፡፡

በአማራና በትግራይ ወንድማማች ህዝቦች ዘመን ተሻጋሪ መልካም ግንኙነት ውስጥ ልዩነት በመፍጠር ወደ ግጭትና ጦርነት እንዲገቡ የሚደረግ ማንኛውም ትንኮሳ፣ ማንኛውም ጸብ አጫሪነት ምንም ዓይነት ተቀባይነት እንደሌለው ምክር ቤቱ መወሰኑንም በመግለጫቸው አመላክተዋል፡፡ በሁለቱ ህዝቦች መካከል ግጭት ለመፍጠር አንዳንድ አካላት የሚያሳዩት ድርጊት በምክር ቤቱ ተቀባይነት እንደሌለውም ተገምግሟል፡፡ ከትግራይ ክልል አመራሮች በኩል የጦርነት ቅስቀሳዎች፣ ሰፊ ወታደራዊ ዝግጅት፣ ወደ አማራ ክልል አዋሳኝ አከባቢዎች ሰራዊት የማቅረብ እና አንዳንድ ፀብ አጫሪ አካሄዶች በአስቸኳይ እንዲቆሙ፤ ከዚህ ድርጊታቸውም እንዲታቀቡ ምክር ቤቱ አሳስቧል፡፡

በትግራይ ክልል የመሸገው፣ በተለይ በለውጡ የተገፋው፣ ስልጣኑን ያጣው፣ ዘራፊው ቡድን፣ ጦርነት ለመቀስቀስ ቢፈልግ እንኳ ሰላም ወዳዱ የትግራይ ህዝብ ዝም ብሎ ይመለከተዋል የሚል እምነት እንደሌለው ነው ምክር ቤቱ ያስታወቀው፡፡
ከእርስ በርስ ጦርነት ኪሳራ እንጂ ትርፍ የለም ያለው ምክር ቤቱ የትግራይ ሕዝብ ለመሸጉትና ሕዝብን መከታ አድርገው ለሚንቀሳቀሱት ጥሪና ትንኮሳ ምንም አይነት መልስ ባለመስጠት ሰላም ወዳድነቱን በተግባር እንዲያስመሰክር ምክር ቤቱ ማሳሰቡን አቶ አሰማኸኝ በመግለጫቸው አስታውቀዋል፡፡

በአማራ ክልል በኩልም ግጭት ከሚፈጥሩ ትንኮሳዎችና የትግራይ ሕዝብን ስጋት ላይ ከሚጥሉ ፀብ አጫሪ ንግግሮች ማንኛውም አካል እንዲቆጠብ፣ እንዲህ ዓይነት ንግግሮች ለሰላም ፈላጊው የአማራ ሕዝብ እንደማይመጥኑትና ይህን በሚያደርጉ አካላት ላይ የእርምት እርምጃ እንዲወሰድ ምክር ቤቱ መወሰኑም ተመላክቷል፡፡

የአማራ ክልል መንግስት የአማራን ሕዝብ ሁለንተናዊ ሰላም ለመጠበቅ፣ የህግ የበላይነትን ለማረጋገጥ፣ የአማራን ሕዝብ ከማንኛውም ጥቃት ለመከላከል የሚያስችል አቅም በመገንባት አስተማማኝ ሰላም እንዲሰፍን ጠንክሮ መስራት እንዳለበት ምክር ቤቱ አቅጣጫ አስቀምጧል፡፡

ዘጋቢ፡- ግርማ ተጫነ

Share and Enjoy !

0Shares
0

Leave a Reply

Your email address will not be published. Required fields are marked *