የተከሰከሰው የኢትዮጵያ አየር መንገድ አውሮፕላን የመጀመሪያ ደረጃ የአደጋ ምርመራ ውጤት ሪፖርት በዛሬው እለት ይፋ ተደረገ።
 
የትራንስፖርት ሚኒስትር ወይዘሮ ዳግማዊት ሞገስ የመጀመሪያ ደረጃ የአደጋ ሪፖርትን አስመልክቶ በሰጡት መግለጫ፥ ምርመራው ዓለም አቀፍ ሂደቶችን ተከትሎ መካሄዱን አንስተዋል።
 
በዚህም መሰረት አደጋው መድረሱን ተከትሎ በትራንስፖርት ሚኒስቴር ስር ያለ የአደጋ ምርመራ ቡድን ስራ እንዲጀምር መደረጉን ገልፀዋል።
 
የምርመራ ቡድኑ ውስጥም የአጋው የደረሰበት ሀገር ባለሙያዎች፣ የአውሮፕላኑ አምራች (ቦይንግ) እና የአሜሪካ አቪዬሽን ባለሙያዎች መካተታቸውን እንዲሁም የፈረንሳይ እና የአውሮፓ አቪዬሽን በምርመራው እንዲሳተፉ ተደርጓል ብለዋል።
 
እስካሁን የተከናወነውን ምርመራ ተከትሎ የመጀመሪያ ደረጃ የአደጋ ምርመራ ውጤት መሰረተም፦
 
1ኛ አውሮፕላኑ የፀና መብረር የሚያስችል የምስክር ወረቀት ያለው መሆኑ መረጋገጡ፣
 
2ኛ አብራሪዎቹ ይህንን በረራ ማድረግ የሚያስችላቸው ብቃትና ፈቃድ እንዳለቸው መረጋገጡ፣
 
3ኛ አውሮፕላኑ ለበረራ ሲነሳ በትክክለኛ መስመር ለመብረር በሚያስችለው ሁኔታ ላይ እንደነበር እና
 
4ኛ አብራሪዎቹ አውሮፕላኑን ለመቆጣጠር ያስችላል ብሎ አምራች ኩባንያው ያስቀመጠውን ሂደት ተከትለው አውሮፕላኑን ለመቆጣጠር የሰሩ መሆኑን በምርመራው መገኘቱ አስታውቀዋል። ይህንን መነሻ በማድረግም የምርመራ ቡድኑ የደህንነት ምክረ ሀሳብ ማስቀመጡንም የትራንስፖርት ሚኒስትር ወይዘሮ ዳግማዊት ሞገስ አስታውቅዋል።
 
በዚህም የቦይንግ 737 ማክስ 8 አውሮፕላኖች ላይ ተደጋጋሚ የሆነና አውሮፕላኑን ለመቆጣጠር ያስችገረ የአውሮፕላንን አፍንጫ የመድፈቅ ችግር በዚህ የመነሻ ምርመራ በመለየቱ አውሮፕላኑን በበረራ ውቅት ለመቆጣጠር የሚያስችል የበረራ ቁጥጥር ስርዓቱን አምራቹ በድጋሚ ሊፈትሸው ይገባል የሚል ምክረ ሀሳብ በሪፖርቱ ተቀምጧል።
 
የአውሮፕላን ስሪቱ ወደ በረራ ከመመለሳቸው በፊት የሚመለከታቸው የአቪዬሽን አካላት በበረራ ወቅት የሚያጋጥመውን የመቆጣጠር ችግር የሚያስወግድ የበረራ ቁጥጥር ስርዓት በበቂ ሁኔታ ሊያረጋግጡ እንደሚገባም መክሯል።
 
የመጀመሪያ ደረጃ የአደጋ ሪፖርቱን መሰረት በማድረግ በመጪው አንድ ዓመት ውስጥ ዝርዝር ሪፖርቱ ለዓለም አቀፍ ማህበረሰቡ ይፋ እንደሚሆንም አስታውቀዋል።
 
የምርመራው አጠቃላይ ግብም የአቭዬሽን ኢንዱሰትሪ ደህንነቱ እንዲጠበቅ፣ ትምህርት ለመውሰድ እና መሰል አደጋ ወደፊት እንዳይደገም ማስቻል መሆኑን ነው ሚኒስትሯ ያስታወቁት።
መጋቢት 1 በደረሰው በዚህ የአውሮፕላን አደጋ የ157 ሰዎች ህይወት ማለፉ ይታወቃል።
(ኤፍ.ቢ.ሲ)

Share and Enjoy !

Shares
Related stories   ደመቀ መኮንን በፊንላንድ የውጭ ጉዳይ ሚኒስትር ከሚመራ የአውሮፓ ህብረት ልዑክ ጋር ተወያዩ

Leave a Reply

Your email address will not be published. Required fields are marked *