በአማራ ክልል ሰሜን ሸዋ ዞን አጣዬ አካባቢ አንፃራዊ ሰላም ያለ ቢሆንም በአንዳንድ አካባቢዎች አሁንም የተኩስ ድምፅ እንደሚሰማ አንድ የዞኑ ባለስልጣን ለዶይቼ ቬለ ተናገሩ፡፡ በአካባቢው መረጋጋት የታየው የፀጥታ ኃይሎች ወደ አካባቢው ከገቡ በኋላ መሆኑንም ገልጸዋል።

የሰሜን ሸዋ ዞን የአስተዳደር እና ፀጥታ ጉዳዮች መምሪያ ኃላፊ አቶ ካሳሁን እምቢያለ በስልክ ለዶይቼ ቬለ እንደተናገሩት ከትናንት በስቲያ ጀምሮ በአጣዬ አካባቢ በተፈጠረው ግጭት በርካታ ህይወት ጠፍቷል። በግጭቱ ምን ያህል ሰዎች እንደሞቱ የተጠየቁት ኃላፊው “በተጨባጭ ቁጥሩን አናውቀውም” ሲሉ ምላሽ ሰጥተዋል። በግጭቱ ብዙ ጉዳቶች መድረሳቸውን እና ቁጥራቸው የበዛ ሰዎች መቁሰላቸውንም ጨምረው ገልጸዋል። አቶ ካሳሁን “ጉዳቱ እና ጥቃቱ በተደራጀ መልኩ ስለነበር በቀጠናው የእምነት ተቋማት ጭምር እስከ ማቃጠል የተደረሰበት ሁኔታ አለ” ሲሉ በአካባቢው ያለውን የጸጥታ ችግር ለDW አስረድተዋል።

የአካባቢውን ሰላም እያወኩ ያሉት “የተደራጁ ኃይሎች” መሆናቸው ሲገለጽ ቢቆይም ኃላፊው ግን “ማሽሞንሞን አያስፈልግም፤ ኦነግ ነው” ሲሉ ወንጅለዋል። “የማይታወቁ ኃይሎች የሚል ማስታመም በእኛ በኩል ተቀባይነት የለውም” የሚሉት አቶ ካሳሁን “በዚያ ቀጠና እያተራመሰ ያለው፣ ተልዕኮ እየሰጠ፣ አጀንዳ እየቀረጸ፣ በተጨባጭ በእቅድ ላይ የተመሰረተ ግጭት እና የሰዎች ህይወት እንዲጠፋ የሚያደርገው ኦነግ ነው። ሌላ ኃይል የለም” ብለዋል።

የአማራ ክልል እና የፌደራል ፀጥታ ኃይሎች ወደ አካባቢው በመግባታቸው አሁን በአካባቢው አንፃራዊ ሰላም እና መረጋጋት እንዳለ የዞኑ የአስተዳደር እና ፀጥታ ጉዳዮች መምሪያ ኃላፊ ገልጸዋል። ሆኖም ዛሬ ጠዋት በአንጾኪያ እና ሀገረማርያም አጤራ በተባሉ አካባቢዎች የተኩስ ድምጽ ይሰማ እንደነበር አልሸሸጉም። በአጣዬ ጫፍ ጃኮብ በተባለ አካባቢ በተለይ የታጠቁት ኃይሎች ከመከላከያ ሰራዊት ጋር ጭምር መጋጨታቸውን ተናግረዋል።

በአማራ ክልል የኦሮሞ ብሔረሰብ አስተዳደር እና በሰሜን ሸዋ ዞን አዋሳኝ አካባቢዎች ያለውን የጸጥታ መደፍረስ ለማረጋጋት የፌደራል እና የክልል የጸጥታ አስከባሪ ተቋማት እርምጃ እንዲወስዱ መታዘዛቸውን የብሔራዊ የደህንነት ምክር ቤት ዛሬ ባወጣው መግለጫ አስታውቋል።

(ዘገባ ፦ ዓለምነው መኮንን ከባሕር ዳር) DW Amharic

Share and Enjoy !

0Shares
0

Leave a Reply

Your email address will not be published. Required fields are marked *