የተከሰተውን የሰላም መደፍረስ ለማረጋጋትና የዜጎች ሰላም ዋስትና እንዲያገኝ የፌደራልና የክልል የፀጥታ አስከባሪ ተቋማት አስፈላጊውን ህጋዊና ተመጣጣኝ እርምጃ እንዲወስዱ ትዕዛዝ መተላለፉን ብሄራዊ ደህንነት ምክር ቤት አስታወቀ።

ብሄራዊ የደህንነት ምክር ቤቱ በመላ ሀገሪቱ እየተስተዋሉ ያሉ የሰላም መደፍረሶችን በአጠቃላይም በአማራ ክልል ኦሮሞ ብሄረሰብ አስተዳደርና ሰሜን ሸዋ ዞን አዋሳኝ አካባቢዎች ያለውን የሰላም መደፍረስ በተለየ ትኩረት በመገምገም መግለጫ አውጥቷል፡፡

በመግለጫውም በከሚሴና አጎራባች አካባቢዎች የተከሰተውን የሰው ህይወት መጥፋትና ንብረት ውድመት በምንም አግባብ ተቀባይነት የሌለው ተግባር መሆኑን አንስቷል። በግጭቱ ህይወታቸውን ላጡ አካላቸው ለጎደለና ንብረታቸው ለወደመባቸው ሁሉ ምክር ቤቱ የተሰማውን ሀዘን የገለጸው ምክር ቤቱ፥ የዜጎች በሰላም የመኖር ዋስትና እና የህግ የበላይነት ጉዳይ የመንግስት ዋነኛ የሃላፊነት ጉዳይ መሆኑን ጠቅሷል። የተከሰተውን የሰላም መደፍረስ ለማረጋጋትና የዜጎች ሰላም ዋስትና እንዲያገኝም የፌደራልና የክልል የፀጥታ አስከባሪ ተቋማት አስፈላጊውን ህጋዊና ተመጣጣኝ እርምጃ እንዲወስዱ ትዕዛዝ መተላለፉንም አውስቷል።

 

ከዚህ ጋር ተያይዞም ብጥብጡን ያቀናበሩት፣ ያነሳሱትና የፈጸሙትን አካላት ለህግ የማቅረቡ ስራም በከፍተኛ ትኩረት እንድሚሰራበት ያነሳው መግለጫው፥ ለዚህም ጥናት የሚያደርግ ቡድን ከፌደራል ተቋማትና ከክልሉ መሰማራቱን ገልጿል።

የጥናት ውጤቱን መሰረት በማድረግም በብጥብጡ እጁ ያለበት ማንኛውም አካል በህግ ተጠያቂ ይደረጋልም ነው ያለው።

ከዚህምባሻገር ችግሮች የሚከሰቱት የራሳቸው አጀንዳ ባላቸው የጥፋት ሃይሎች ሆኖ ሳለ በመደበኛም ሆነ በማህበራዊ ሚዲያ የህዝብ ለህዝብ ግጭት የተፈጠረ በማስመሰል የማራገብ ስራ የሚሰሩ አካላት ከድርጊታቸው እንዲቆጠቡና ጉዳዩን በሰከነ ሙያዊ ስነ ምግባርና የሃገርን አንድነት በሚጠብቅ መልኩ እንዲይዙትም አሳስቧል።

መንግስት ህግን ለማስከበርና የዜጎችን ሰላም ለማስጠበቅ ከመቼውም ጊዜ በላይ ቁርጠኛ መሆኑን ያነሳው መግለጫው፥ ህገ ወጥ ተግባራት ላይ የሚሳተፉ አካላት ከድርጊታቸው የማይቆጠቡ ከሆነ መንግስት ህግን ለማስከበር ወደ ኋላ እንደማይልም አመላክቷል።

FBC

Share and Enjoy !

0Shares
0

Leave a Reply

Your email address will not be published. Required fields are marked *