By – Misganaw Tadesse
ሴዲሁ በሴኔጋል የካሳማንሴን ወንዝ ተደግፋ ውላ ተደግፋ የምታድር ነገር ግን ከሀገሪቱ ደሀ ከተሞች መካከል አንዱዋ ስትሆን 25 ሺህ ያህል ህዝብ ይኖርባታል። በዚህችው ደሀ የሴኔጋል ሚጢጢ ከተማ ውስጥ ደግሞ “የድሃ ድሃ” የሚል ስያሜ የተሰጣቸው ነዋሪዎች የሚኖሩባት ባምባሊ የምትባል ትንሽዬ መንደር አለች። በዚህች መንደር ደግሞ 2 ሺህ ህዝብ ብቻ ይኖራል።
በእንግሊዝ ፕሪሚየር ሊግ ልዩነት ፈጣሪ ከሆኑት መካከል አንዱ የሆነው የሊቨርፑሉ አጥቂ ሳዲዮ ማኔ በዚህችው የባምባሊ መንደር ነው ተወልዶ ያደገው። ሆኖም ግን ማኔ ዛሬ ሀብታምና ዝነኛ ቢሆንም የትናንት ማንነቱን የሚረሳ ሰው አይደለም። የእረፍት ጊዜ ባገኘ ቁጥር ወደዛው ብቅ ብሎ ይጠይቃቸዋል።
የ27 አመቱ የቀዮቹ አጥቂ ከዚህ ቀደም በትውልድ መንደሩ ለሚገኙ አድናቂዎቹ 300 የሊቨርፑልን ማሊያ ገዝቶ እንደላከላቸው ከእንግሊዝ ጋዜጦች አንብቤ እንደነበር አስታውሳለሁ። አሁን ደግሞ ጀግናው ሌላ ጀብዱ መፍፀሙን ቀጥሎበታል።
ማኔ በሚጢጢዬዋ የባምባሊ መንደር ለሚገኙ ወገኖቹ ዘመናዊ ሆስፒታል እና ስቴዲየም ከኪሱ አውጥቶ እያሰራ ሲሆን ሁለቱም የመሰረት ግንባታቸው አልቆ በዚህ ሳምንት ዋና ግንባታቸው መካሄድ ጀምሩዋል። አሁንም ግን ማኔ በዚህ የሚያበቃ አልሆነም።
የባምባሊ ህፃናት በአቅራቢያቸው ሀይስኩል ስለሌለና ሌላ ከተማ ሄደው ለመማርም ወላጆቻቸው በድህነት የደቀቁ በመሆናቸው አብዛኛዎቹ የትምህርት ደረጃቸው ከአንደኛ ደረጃ የዘለለ አይደለም። ይህ ሁኔታ ያሳዘነው ማኔ በአጭር ጊዜ ውስጥ ግንባታው ተጠናቅቆ አገልግሎት መስጠት የሚጀምር ሀይስኩል ለመገንባት 300,000 ዶላር መመደቡን ሰሞኑን ይፋ አድርጉዋል።
ማኔ ይቀጥላል። ያው ሁሉም እንደሚያውቀው በህዝበ ሙስሊሙ ዘንድ በከፍተኛ ጉጉት የሚጠበቀው ታላቁ የረመዳን ፆም ከቀናት በሁዋላ ይገባል። እናም ማኔ ምን አደረገ? በባምባሊ የትውልድ መንደሩ የሚገኙት 2 ሺህ ነዋሪዎች ፆሙን ያለ ችግር ያሳልፉ ዘንድ በትናንትናው እለት ለእያንዳንዱ የመንደሪቱዋ ነዋሪ በነብስ ወከፍ 50፡50 ሺህ የሴኔጋል ፍራንክ ፆም መያዣ ብሎ አበርክቱዋል። ማኔ ጠንካራ የእስልምና እምነት ተከታይ ሲሆን ከእያንዳንዱ ጨዋታ በፊት ረዘም ያለ ዱአ (ፀሎት) ያደርጋል። ከዚህ በላይ ልባም ሰው ይኖር ይሆን? በዚህ አጋጣሚ በመላው አለም ለምትገኙ ሙስሊሞች መልካም የፆም ወቅት እንዲሆንላችሁ ከወዲሁ ተመኝቻለሁ!

Related stories   ኢትዮጲያ የማን ናት? መብቱ የዜጎች፣ ስልጣኑ የብሔሮች ነው! - ክፍል-2

Leave a Reply

Your email address will not be published. Required fields are marked *