ወንድወሰን ተክሉ

ከሁሉም በፊት የአንድም ኢትዮጵያዊ ወገኔ ህይወት አይደለም በግፍ መገደል ይቅርና ተፈጥሮአዊውን መብቱ ቅንጣት ታህል እንድትነካበት እማልፈቅድ መሆኔን ለመግለጽ እወዳለሁ፣

ይህን ካልኩ በሃላ ሰሞኑን በቤኒሻንጉልና ጉምዝ ክልል በአማራ ተወላጆች ላይ ዘር ተኮር ጥቃት መፈጸሙን በሀዘን ሰምተናል፣ ድርጊቱንም በመቃወም ትናንት በእለተ ሀሙሥ በመላይ የአማራ ከተሞች ሰላማዊ ሰልፍ የተካሄደ ሲሆን የጥቃቱን ዜና በሰሙ የአማራ ተወላጆች በኩል በጉምዝ ተወላጆች ላይ የአጸፋ ጥቃት ተከፍቶ ለህልፈት የተዳረጉ ሰዎችን መጎዳት ሰምተናል፣ በሁለቱም ጥቃቶች የተሰውት የአማራ ተወላጆችና የጉምዝ ተወላጆች አንድ የሆኑ የሰው ልጆች የሆኑና እኩል ኢትዮጵያዊያን በመሆናቸው ጉዳቱ ያሳዝናል፣

 

 

በንጹሃን እልቂትና ሞት እሚደሰት ሰይጣናዊ ስብእናን የተላበሰ ሰው መሳይ ሰይጣን ካልሆነ በስተቀር ሰው የሆነ ሁሉ ይኖራል ተብሎ በማይገመትበት ሁኔታ ከአንዳንድ ወገኖች በኩል ወዳጅና የሰብዓዊነት ተቆርቋሪ መሥለው እያሰራጩ ያለውን የፈጠራ ዜና በድንጋጤ አግራሞት እንድናይ ያደረገን ተግባሮችን እያየን እና እየሰማን ነው፣

በአክትቪስትና ጋዜጠኛ ጁሃር መሃመድ የተቋቋመው ጉለሌ ፖስት ድረገጽ ፈጽሞ ሃላፊነት በጎደለው ሁኔታ ከ250 በላይ የጉምዝ ተወላጆች በአማራ ተወላጆች ተጨፍጭፈዋል በሚል ዜና ከዓመታት በፊት በሰሜን ዩጋንዳ የእርሰበርስ ጦርነት ያለቁትን ሰለባዎችን ፎቶ ሾፕ ተጠቅሞ አማራውን እንደ ደም የጠማው ጨፍጫፊ አድርጎ ማቅረቡን እጅግ ሃላፊነት የጎደለው ተግባር መሆኑን ብቻ ሳይሆን እምንረዳው በህዝቦች እርሰበርስ ግጭት ለማትረፍ ምን ያህል የቃመጠ እንደሆነ እንድናውቅ አድርጎናልና መላው የኢትዮጵያ ህዝብ ይህን መሰሉን መሰሪ ተግባር እንዲረዳና ብሎም በጽኑ ኮንኖ እንዲያጋልጠው ያስፈልጋል

በቤኒሻንጉል ያለው የአማራ ተወላጅ ህልውና ተጠብቆለት በሰላም ሰርቶ የመኖር መብቱ ሊከበርለት እንጂ በማንነቱ ሊጠቃ አይገባም የምንለውን ያህል በአማራ ክልል የሚኖረውም የጉምዝም ሆነ የማንኛውም ብሄር ተወላጅ በሰላም ወጥቶ የመግባትና የመስራት መብቱ የተጠበቀለት መሆን አለበት በሚለው አቃም በማመን ነው፣

ዘር ተኮር ግጭቶችና ትንኮሳዎች እንዳይነሱ እና ድንገትም ከተነሳ ሳይባባስና የብዙ ንጹሓንን ህይወት ሳይቀጥፍ በአጭር መቀጨት አለበት በሚል እምነት ፍትህን በምንሻበት ወቅት ተቆርቋሪና አዛኝ መስሎ በፎቶ ሾፕ የተሰበሰበን ፎቶ ይዞ ህዝብ ተጨፈጨፈ ብሎ ማራገብ በሀገር ደህንነትና በህዝቦች አብሮ ኗሪነት ላይ ቤንዚን እንደማርከፍከፍ የሚቆጠር ሴራ እንጂ መፍትሄ ማቅረብ እንዳልሆነ ህዝባችን ሊረዳ ይገባል፣

Related stories   ጉደኛው መሪያችን - ዶ/ር ዘላለም እሸቴ

በእርግጥ ዛሬ ሀገራችን እጅግ Delicate በሆነ ፖለቲካዊ ሁኔታ ላይ ባለችበት ወቅት በማወቅም ሆነ ባለማወቅ የሚነሱ ብሄር ተኮር ግጭቶችን በቶሎ ለመቅጨት ከፍተኛ ጥረት በሚፈለግበት ሁኔታ እጅግ አክራሪና ጠርዝ የረገጡ ቡድኖች ከኦሮሞ፣አማራና ትግሬ በኩል ለግል ድብቃዊ የፖለቲካ አጀንዳ ማስፈጸሚያነት ቤንዚን እያርከፈከፉ ሲያራግቡ እያየን ነውና ሁላችንም ልንጠነቀቅ ይገባል እላለሁ።

copied from satenaw

Leave a Reply

Your email address will not be published. Required fields are marked *