በቤኔሻንጉል ጉሙዝና አካባቢው ‹‹ለፀጥታ ችግር ምክንያት ናቸው›› ተብለው የተጠረጠሩ የመንግሥት የሥራ ኃላፊዎችን በቁጥጥር ሥር የማዋሉ ተግባር እንደቀጠለ ነው፡፡

ባሕር ዳር፡ ግንቦት 18/2011ዓ.ም (አብመድ) የማንዱራ ወረዳ ቴክኒክ ሙያና ኢንተርፕራይዞች ልማት ጽሕፈት ቤት ኃላፊ ወይዘሮ ሙሉጎጃም አማረ እና የወረዳው አስተዳደርና ፀጥታ ጉዳዮች ጽሕፈት ቤት ኃላፊ አቶ ሙሐመድ አረጋ ትናንት በቁጥጥር ሥር መዋላቸው ታውቋል፡፡

በአማራ ክልል ጃዊ ወረዳ ደግሞ የወረዳው ዋና አስተዳዳሪ አቶ ደስታው ሽመልስ እና የፖሊስ አዛዡ ኢንስፔክተር ካሳ ድረስ ትናንት በቁጥጥር ሥር ውለዋል፡፡

ባሳለፍነው ዓርብ ዕለት በአካባቢው ሠላምና መረጋጋት ለማስፈን የተሠማራው የኢፌዴሪ መከላከያ ሠራዊትና የፌዴራል ፖሊስ ከግጭቱ ጋር በተያያዘ የተጠረጠሩ የመንግሥት የሥራ ኃላፊዎችንና ግለሰቦችን በቁጥጥር ሥር ማዋል መጀመሩን መዘገባችን ይታወሳል፡፡ ባለፈው ዓርብ በቁጥጥር ሥር ከዋሉት መካከል የመተከል ዞን አስተዳደርና ፀጥታ ጉዳዮች መምሪያ ኃላፊ አቶ ፋንቻ አምሳያ እና የግልገል በለስ ከተማ ከንቲባ አቶ ጊሳ ዚፋህ በቁጥጥር ሥር መዋላቸው ይታወሳል፡፡

አብመድ በግጭቱ ወቅትና ከዚያም በኋላ ዘገባዎችን ሲሠራ ነዋሪዎች በሰጡት አስተያዬት ግጭቱ በየደረጃው ባሉ የመንግሥት የሥራ ኃላፊዎች የሚመራና መልሰው አስታራቂ ሆነው የሚቀርቡትም የግጭቱ አባባሾች የሆኑት ባለስልጣናት እንደሆኑ ሲናገሩ ነበር፡፡

ዘጋቢ፡- ወንዳጥር መኮንን

Related stories   አዲስ አበባ በቅርብ ጊዜ ውስጥ ትፈነዳለች

Leave a Reply

Your email address will not be published. Required fields are marked *