የኦሮሚያ ክልል ከ700 ሺህ በላይ ተፈናቃዮችን ወደ ቀያቸው መመለሱን የክልሉ የአደጋ ስጋት ስራ አመራር ኮሚሽን አስታውቋል። የክልሉ የአደጋ ስጋት ስራ አመራር ምክትል ኮሚሽነር አቶ ገረመው ኦሊቃ እንደገለጹት፥ በክልሉ ባለፉት 2 ዓመታት ከሶማሌ ክልልና አዋሳኝ አካባቢዎች፣ ከቤንሻንጉል ጉሙዝ ክልልና አጎራባች ዞኖች፣ ከጌዲዮ፣ ጉጂ አካባቢ ከ1ነጥብ4 ሚሊዮን በላይ ዜጎች ተፈናቅለዋል።
 
ከእነዚህ ተፈናቃይ ዜጎች መካከል ግማሽ ያህሉ ወደ ቀያቸው ሊመለሱ መቻላቸውን አመልክተዋል። በኦሮሚያ ክልል ከፍተኛ የሆነ የተፈናቀዮች ቁጥር ቢኖርም በህብረተሰቡ፣ መንግስት፣ ባለሀብቶች፣ የተለያዩ አጋር ድርጅቶች ባደረጉት ርብርብ እርዳታ በማድረስ በተፈናቃዮች ላይ ከፍተኛ ጉዳት እንዳይደርስ መከላከል መቻሉን ገልጸዋል።
 
የተለያየ የፖለቲካ ፍላጎት ባላቸው ግለሰቦች የፖለቲካ ሴራ ምክንያት ከምስራቅ ሀረርጌ፣ ምዕራብ ሀረርጌ፣ ባሌ፣ቦረና፣ጉጂ፣ምዕራብና ምስራቅ ወለጋና አጎራባች የቤንሻንጉል ጉሙዝ ክልል በርካታ ቁጥር ያላቸው ዜጎች ተፈናቅለዋል።
 
መጠለያ፣ምግብና መድኃኒት በማድረስ በሰው ህይወት ላይ ጉዳት እንዳይደርስ ድጋፍ እንዲያገኙ መደረጉን ምክትል ኮሚሽነሩ ገልጸዋል።
 
ባለፉት ሁለት ሳምንታት ተፈናቃዮችን ቀሰመ መኖሪያቸው ለመመለስና መልሶ ለማቋቋም የተደረገው ጥረት ስኬታማ እንደሆነ የገለጹት አቶ ገረመው፥ በምስራቅና ምዕራብ ወለጋ ብቻ 200 ሺህ ተፈናቃዮች መመለሳቸውን ተናግረዋል።
 
ወደቀያቸው ሲመለሱ ምንም የሌላቸው በመሆኑ እንዳይቸገሩ ድጋፍ ለማድረግ ቅድመ ዝግጅት መደረጉን ጠቁመዋል። በምዕራብ ጉጂና በጌዲኦ ህዝቡን እርስ በርስ የሚያጋጩ ችግሮችን በማጥናትና በማወያየት ህዝቡ ወደቀየው እንዲመለስ መደረጉን ያመለከቱት ምክትል ኮሚሽነሩ ፥ከደቡብ ክልል የበላይ አመራር ጋር በመሆን ችግሩን ለመፍታት መሰራቱን ገልጸዋል።
 
የጌዲኦ ተፈናቃዮችን ወደ ቀያቸው ለመመለስ የተደረገው ጥረት ችግር አጋጥሞት እንደነበር ገልጸው፥በተለያየ ጊዜ የተፈናቀሉትን በማጥናት ወደ ቀያቸው ለመመለስ ሰፊ ጥረት መደረጉን አመልክተዋል።
 
”በምዕራብ ጉጂና ጌዲዮ አካባቢዎችም ወደ 90 ሺህ ዜጎች ወደ ቀያቸው ተመልሰዋል፤ በአጭር ጊዜ ሁሉም ተፈናቃይ ወደ ቀዬው የሚመለስ መሆኑንም ጠቁመዋል።
 
ተፈናቃዮች ወደ ቀያቸው ሲመለሱ በፍላጎታቸው መሰረት መሆኑን የተናገሩት አቶ ገረመው፤ ባገኘነው አጠቃላይ የዳሰሳ መረጃ ሁሉም በአንድ ድምጽ ወደ ቀያችን ተመልሰን ኑሯዋችን እንምራ የሚል ነው ብለዋል።
 
ተፈናቃዮች በዘላቂነት እሰኪቋቋሙ ድረስ የክልልና የፌዴራል መንግስት ድጋፍ ያደርጋል ያሉት አቶ ገረመው፥ ዘላቂ ሰላም እንዲኖር ወጣቶች፣ የአገር ሽማግሌዎች፣የሃይማኖት አባቶች ውይይት እያደረጉ እንደሆነ ጠቁመዋል።
 
በህዝቦች መካከል ግጭት በመፈጠር ህብረተሰቡ እንዲፈናቀል የሚያደርጉ እና ከዚህ ተጠቃሚ የሆኑ አካላትን በህግ ተጠያቂ ለማድረግ መንግስት ጥናት እያደረገ መሆኑን አመላክተዋል። በህዝብ መካከል ጣልቃ የሚገቡትን በመለየት እርምጃ እየተወሰደ እንደሚገኝም ተናግረዋል።
 
በቀጣይ እንዲህ አይነት ችግሮች እንዳይከሰቱ ህዝቡና የጸጥታ አካል ቀድመው የመከላከል ስራ እንደሚሰሩ ያላቸውን እምነት ገልጸዋል።
 
በክልሉ በግጭት የተፈናቀሉትን ጨምሮ 2 ነጥብ 4 ሚሊዮን ህዝብ የእለት እርዳታ የሚፈልጉ ናቸው።
 
ምንጭ ፦ኢዜአ
Photo – zaggole file
Related stories   በደቡብ ኦሞ ዞን ለበርካቶች ሞት ተጠርጣሪ የሆኑ 11 ሰዎች በቁጥጥር ሥር ዋሉ

Leave a Reply

Your email address will not be published. Required fields are marked *