የአዲስ አበባ ከተማ አስተዳደር ንግድና ኢንዱስትሪ ቢሮ ከሌሎች ሴክተር ተቋማት ጋር በመሆን በቅርቡ ተገቢ ያልሆነ የዋጋ ጭማሪ ባደረጉ የንግድ ተቋማት ላይ እርምጃ መወሰዱን አስታውቋል፡፡

የአዲስ አበባ ንግድና ኢንዱስትሪ ቢሮ ምክትል ኃላፊና የንግድ ዘርፍ አስተባባሪ አቶ መስፍን አሰፋ በተለይ ለኢብኮ እንደገለጹት ከነጋዴው የኅብረተሰብ ክፍል ጋር የጋራ መግባባት ለመፍጠር ውይይቶች ተደርገዋል፤ ተገቢ ያልሆነ የዋጋ ጭማሪ ባደረጉ አካላት ላይም ሕጋዊና አስተዳደራዊ እርምጃ ተወስዷል፡፡

እርምጃ ከተወሰደባቸው ተቋማት መካከል የአትክልትና ፍራፍሬ መሸጫ ሱቆች፣ ዳቦ ቤቶች፣ ወፍጮ ቤቶች፣ የእህል መነገጃ ቤቶች እና ምግብ ቤቶች እንደሚገኙበት ኃላፊው መናገራውን ኢብኮ ዘግቧል፡፡

በተለይም ዋጋ የጨመሩ፣ ያለ ደረሰኝ ግብይት የፈጸሙ፣ ግራም ያጎደሉና በተለያዩ መንገዶች በኅብረተሰቡ ላይ ጫና ያደረጉ የንግድ ተቋማት ላይ እርምጃ መወሰዱ ነው የተገለጸው፡፡

በተወሰደ እርምጃም መሻሻሎች እንደታዩና አልፎ አልፎም ከዚህ በፊት ከነበሩበት ዋጋ በታች የወረዱ ግብይቶች መኖራቸውን ጭምር ኃላፊው አመልክተዋል፡፡

የቁጥጥር ሥራን ከማጠናከር በተጨማሪ ኅብረተሰቡ ምርቱን በተሻለ ዋጋ የሚያገኝበትን አማራጮች በመፍጠር፣ በምርትና በሽያጭ ሂደት ውስጥ ምንም እሴት የማይጨምሩ ነገር ግን በሕገ ወጥ መልኩ በገበያ ስርዓት ውስጥ የተሰገሰጉ ደላሎችን በማስወገድ ኅብረተሰቡ በቀጥታ ከገበሬ ምርቱን ማግኘት እንዲችል ከተለያዩ ክልሎች በተለይም ከኦሮሚያ፣ አማራና ደቡብ ክልሎች ጋር እየሠራ መሆኑንም አቶ መስፍን ገልጸዋል፡፡

አብመድ

Related stories   መንግስት ጎንደርና አካባቢዋን አደራጅቶ ሊያስታጥቅ ነው፤ " ሥዕሉ ግልጽ ነው" ብ/ጀ/አሳምነው ጽጌ

Leave a Reply

Your email address will not be published. Required fields are marked *