በአማራ ክልል በሰኔ 15 ዓ.ም ተሞክሮ የከሸፈውና የክልሉን ከፍተኛ አመራሮች ለህልፈት የዳረገው የመፈንቅለ መንግስት ሙከራ የምርመራ ውጤት በቅርቡ ይፋ እንደሚደረግ የአማራ ክልል ፖሊስ ኮሚሽን አስታወቀ።

የአማራ ብሄራዊ ክልል ምክር ቤት ሰሞኑን እያካሄደ ባለው 5ኛ ዙር፤ 4ኛ ዓመት የስራ ዘመን 13ኛ መደበኛ ጉባኤ ከምክር ቤቱ አባላትም በሰኔ 15 በተፈጸመው የመፈንቅለ መንግስት ሙከራ እና ሌሎች የክልሉ ነባራዊ ሁኔታዎች ዙሪያ ጥያቄዎችና አስተያየቶች ቀርበዋል። የክልሉ ፖሊስ ኮሚሽን ኮሚሽነር እና የክልሉ ምክትል ርዕሰ መስተዳድር ምላሽና ማብራሪያም ሰጥተዋል።

የክልሉ ፖሊስ ኮሚሽን ኮሚሽነር አበረ አዳሙ እንደተናገሩት፤ የክልሉ የጸጥታ ሀይልና ህዝቡ ባደረገው ርብርብ በርካታ ተጠርጣሪዎችን በቁጥጥር ስር ማዋል ተችሏል። በተጠርጣሪዎች ዙሪያ ማስረጃዎች እየተሰባሰበ ነው። የተፈጸመው ወንጀል ከባድና ውስብስብ በመሆኑና ምርመራውም የተለያዩ ዘርፎች ያሉት በአንድ ወር ውስጥ አጣርቶ መጨረስ አልተቻለም ብለው ነገር ግን የምርመራ ውጤቱን በቅርቡ ይፋ እንደሚደረግ አስታውቀዋል።

ባለፈው አንድ ወር የሰውና ሳይንሳዊ የቴክኒክ ማስረጃዎችን የማሰባሰብ ተግባር ሲከናወን እንደነበር ያነሱት ኮሚሽነር አበረ፤ ጥቂት ያልተያዙ ተጠርጣሪዎችን ለመያዝ ጥረት እየተደረገ መሆኑን አንስተዋል።

እንደ አቶ አበረ ማብራሪያ፤ በወንጀሉ ተጠርጥረው በቁጥጥር ስር ከዋሉት የልዩ ሀይል አባላት 113ቱ ተለይተው ተለቀዋል። 105ቱ ተጨማሪ ምርመራ እየተደረገባቸው ነው። ከተጠርጣሪዎቹ መካከል የማጣራት ስራው ከተከናወነ በኋላ እየተለቀቁ ሲሆን በሌላ አዳዲስ ተጠርጣሪዎችም በቁጥጥር ስር እየዋሉ በመሆናቸው ቁጥሩ ከጊዜ ወደ ጊዜ ከፍና ዝቅ የሚል ነው።

የክልሉ የጸጥታ መዋቅር ከህዝቡ ጋር በመሆን ባደረገው ጥረት ክልሉን ከመፍረስና ህዝቡን ከከፋ ጉዳት መታደግ መቻሉን ያብራሩት ኮሚሽነሩ፤ የክልሉ የጸጥታ መዋቅርና ህዝቡ ለፈጸሙት ገድልም አመስግነዋል።

ፌስቡክን በመጠቀም የአማራን ህዝብ ለመበጥበጥና የተጀመረውን ምርመራ ለማኮላሸት የሚደረገውን ጥረት ህዝቡ እንዲታገላቸው፤ በሚታወቁና ህዝብን ለመከፋፈል ተግተው እየሰሩ ያሉ ግለሰቦች ላይ መንግስት ትኩረት ሰጥቶ ቁጥጥር በማድረጉ ከተግባራቸው እንዲታቀቡ ሊደረግ ይገባል ብለዋል። ምክር ቤቱም በዚሁ ረገድ እገዛ ሊያደርግ ይገባል ብለዋል።

የክልሉ ምክትል ርዕሰ መስተዳድር አቶ ላቀ አያሌው በበኩላቸው በወንጀል ምርመራው ላይ እየተሳተፉ ያሉ ባለሙያዎችና አመራሮች ስብጥር ዙሪያ ማብራሪያ ሰጥተዋል። በምርመራው 38 ባለሙያዎች እየተሳተፉ ሲሆን፤ ሰባት ከፌዴራል ፖሊስ ወንጀል ምርመራ፤ 17 ወንጀል የአማራ ክልል መርማሪ ባለሙያዎች፤ ስድስት የአማራ ፖሊስ መረጃ ባለሙያዎች አሉበት፤ አምስት የፌዴራል ጠቅላይ አቃቤ ህግ እና ሶስት የአማራ ክልል ጠቅላይ አቃቤ ህግ ናቸው ብለዋል። የመርማሪዎቹ ቁጥርና ስብጥር ምርመራው ምን ያህል በጥንቃቄና በተሰባጠረ መልኩ እየተካሄደ እንደሆነ ማሳያ ነው ብለዋል።

ምርመራውን በበላይነት የሚመሩትም የክልሉ የጸጥታ መዋቅር ውስጥ ያሉ ሰዎች ናቸው ያሉት አቶ ላቀ፤ በፌዴራል ፖሊስና በጠቅላይ አቃቤ ህግም ምርመራውን እንዲመሩ የተደረጉት በፊት በአማራ ክልል ሲሰሩ የነበሩና በፌዴራል ፖሊስና በጠቅላይ አቃቤ ህግ ውስጥ በቅርበት የሚሰሩ ናቸው። የክልሉ ካቢኔም በቅርበት እየገመገመ መሆኑን አንስተዋል።

አዲስ ዘመን

Related stories   ኦህዴድና ብአዴን ባለመስማማታቸው የኢህአዴግ ስራ አስፈጻሚ ስብሰባው ተቋረጠ

Leave a Reply

Your email address will not be published. Required fields are marked *