ለኢንቨስትመንት መሬት ከወሰዱና ከአላለሙ ባለሃብቶች በመንጠቅ ለአልሚ ባለሀብቶችና ለወጣቶች እንደሚሰጥ የቤኒሻንጉል ክልል ምክር ቤት አስታወቀ፡፡

ምክር ቤቱ ከትናንት በስቲያ ማክሰኞ በጀመረው የ5ኛ 5 ዓመት 5ኛ የስራ ዘመን 9ኛ ጉባኤም የአስፈጻሚ አካላት ሪፖርት ሲገመግም እንደገለጸው፣ በተለይ የግብርናውንና የማዕድን ዘርፍ ስራዎችን ለመስራት መሬት ወስደው ያላለሙት ይነጠቃሉ፡፡ ለወጣቶችና ለአልሚ ባለሃብቶችም ይሰጣል፡፡

የክልሉ ምክር ቤት የሕዝብ ግንኙነት  ዳይሬክቶሬት ዳይሬክተር አቶ ተስፋዬ ታደሰ በተለይ ለአዲስ ዘመን እንደገለጹት፤ ክልሉ የበርካታ ጸጋዎች ባለቤት እንደሆነ ጠቅሰው፤ በተለያዩ ዘርፎች ማልማት የሚፈልጉ ባለሃብቶች መሬት ተረክበው መሰማራታቸውን ተናግረዋል፡፡

ይሁን እንጂ በተሰማሩባቸው ዘርፎች ውጤት አሳይተው ለሥራ አጥ ወጣቶች ሥራ በመፍጠርም ሆነ በምርት ክልሉንና ሀገራቸውን በመጥቀም በኩል የሚያበረታታ ተግባር አከናውነዋል የሚል ግምገማ ምክር ቤቱ አለማንሳቱን አብራርተዋል፡፡

በመሆኑም በክልሉ በተለይም በግብርናው እና ማዕድን ዘርፍ እናለማለን በሚል ከክልሉ መሬት ተረክበው አልምተው ያላሳዩ ባለሃብቶች እንዲነጠቁ የክልሉ ምክር ቤት በግምገማው ማንሳቱን አቶ ተስፋዬ አመልክተዋል፡፡

ዳይሬክተሩ አያይዘው እንዳነሱት የመስኖ ስራ አፈጻጸም ዝቅተኛ እንደሆነ ከምክር ቤት አባላት ጥያቄ ተነስቶ እንደነበረ አስታውሰው፤ ለዚህ በምክንያትነት የሚጠቀሰው መሬት የወሰዱት ባለሃብቶች አልሚ ባለመሆናቸው እንደሆነ ገልጸዋል።

ክልሉ የ2011 በጀት ዓመት የመንግስት ስራ አፈጻጸም በገመገመበት ወቅት በርካታ ጥያቄዎች ከምክር ቤት አባላት ተነስተው ውይይት እንደተደረገባቸው ገልጸዋል፡፡ በመጨረሻም ምክር ቤቱ በዛሬ ውሎው የ2012 የክልሉ በጀትና የተለያዩ አዋጆች ቀርበው እንደሚጸድቁ ይጠበቃል ብለዋል፡፡

አዲስ ዘመን ሐምሌ 25 ቀን 2011

 መሐመድ ሁሴን

Related stories   በቻይና የተደረሱት ስምምነቶች ...

Leave a Reply

Your email address will not be published. Required fields are marked *