የሁለተኛ ደረጃ መልቀቂያ ፈተና ውጤት ”አስተራረም” አሳፋሪ በመሆኑ እያወዛገበ ነው፡፡ ጉዳዩ የሚመለከተው አካልም በቂ መረጃ በወቅቱ መስጠት ባለመቻሉ ክስና እንካስላንታው፤ መልስና የመልስ ምቱ የብሔር ፖለቲካውን መስመር ተከትሎ እንደተለመደው የጥላቻ መርዙን በሚረጭ መልኩ እየተካሄደ ነው፡፡ የግጭት አደጋውም በዛው ልክ እየተራገበ ነው፡፡ ዝርዝር መረጃው በፍጥነት እና በተለያየ መስፈርት ተመዝኖ ግልጽ እስከሚሆን ድረስ ከመላ ምት በመቆጠብና ችግሩን ከተቋምና ከግለሰብ ወይም ከቡድን ሚና አውጥቶ ወደ ብሔር ማሸጋገሩ ሊታሰብብት የሚገባው ጉዳይ ነው፡፡ በማንኛውም ጉዳይ ላይ ብሔርን እያንጠለጠሉና የብሔር ሰልፍን እያሳመሩ መጠዛጠዙና የጥላቻ መርዝ መረጫጨቱ ከቀጠለ ከፊታችን የተጋረጠውን አደጋ ከማባበስና በተቀጣጠለው እሳት ላይ ቤንዚን ከማርከፍከፍ ውጭ አንዳች ፋይዳ ያለው ጉዳይ እንደማናገኝበት ለመረዳት ሊያዳግተን አይገባም፡፡ 
የሁለተኛ ደረጃ መልቀቂያ ፈተና መሰረቅና ውጤቱ ባልተጠበቀ ሁኔታ ተዛብቶ መጠናቀቅ በሀገራችን የተለመደ ጉዳይ ነው፡፡ ከደርግ የስልጣን ማብቂያ ዘመን ጀምሮ ፈተናዎች ቀድመው እየተሰረቁ ከነመልሳቸው ገበያ ላይ ይቸበቸቡ እንደነበር ይታወቃል፡፡ አክቲቪስቶችና የነጻነት ታጋዮችም የፖለቲካ ማገቻና መታገያ መሳርያ አደርገው ሲጠቀሙበት እንደነበር የቅርብ ጊዜ ትዝታ ነው፡፡ በርካቶችም በዚህ መንገድ በተገኘ ሃሰተኛ ውጤት ወደ ዩኒቨርስቲዎች በመግባት ዝግጅት የነበራቸውን ተማሪዎች እድል ያመከኑ ቢሆኑም፣ እነሱም ከአቅምና ዝግጅት ማነስ የተነሳ አንድ ሰሚስተር አንኳን ማለፍ እያቃታቸው ከዩኒቨርስቲዎች ለመባረረር በቅተዋል፡፡ የችግሩ መንስኤውም ሆነ መዳረሻውና ውጤቱ ይህው ነው፡፡ ከብሔር ጋር የሚያገናኘው አንዳችም ነገር የለም፡፡
በእርግጥ የዛሬውን ለየት የሚያደርገው የውጤቱ መዛባት መጠነ ሰፊ መሆኑና ጣት መጠቋቆሙ እንደ ፖለቲካው ብሔር ተኮር ቅርጽ መያዙ ነው፡፡ ለዚህም በቂ መነሻ አለ፡፡ የብሄር ፖለቲካ ሁሌም እራሱን ችሎ፤ በራሱ መቆም ስለማይሆንለት፣ በሌላው ላይ ካልተንጠለጠለ እርካታ አያገኝም፡፡ በሌላው ላይ ካልተንጠላጠለ አቀጣጣይ የሆነ የመታገያ አቅም፣ አጀንዳና ትንፋሽ ስለሚያጥረው ብዙ ርቀት መሄድ አይችልም፡፡ የብሔር ፖለቲከኞቹም ከብሔር ማንነታቸው የከረረ የስበት መዘውር የተነሳ ሚዛናዊነት ስለሚጎድላቸውና እሮሯቸውን ለማስተጋባትና ብሶታቸውን ከፍ አደርጎ ለመጮህ ብሔረተኝነቱ ስለሚጠቅማቸው ማንኘውንም አጀንዳ ከብሄራቸው ጋር ማያያዝ የትግል ስልታቸው ነው፡፡ ዘንድሮም የመጭው ትውልድ ወሳኝ አጀንዳ የሆነው የትምህርት ስርዓት ይህንኑ መስክ ተቀላቅሏል፡፡
ላላፉት ሶስት ዓመታት በአንጻራዊነት ቢሆንም በሁሉም ክልሎች ሊባል በሚችል ደረጃ ወጣቱ ዋነኛ ተግባሩ የሆነውን መማር እርግፍ አድርጎ ትቶ በጥላቻ በመጠመድ ፋብሪካ፣ ኢንዱስትሪና የእርሻ ልማት ተቋማትን እንዲያቃጥልና እንዲያወድም አልፎ ተርፎም ጎራ ለይቶ እርስ በርሱ እንዲተላለቅ ሲያበረታቱት የነበሩት ሃይሎች ዛሬ ላይ የዘሩትን በከፊልም ቢሆን ማጨድ መጀመራቸውን በዓየናቸው መመልከት ሲጀምሩ፤ ቀኝ ኃላ ዙር ብለው ጭዳ ሲያደርጉት የነበረው ትውልድ ተቆርቋሪ በመምሰል በአዲስ ቅላጼ ብቅ ሲሉ እየተመለከትን ነው፡፡ 
ቀጣዩ ትውልድ የሚጠቅመው በጥላቻ ፈረስ ተጭኖ ሌላውን መጤ እያለ ማሳደድ ወይም ነገ ተቀጥሮ የሚሰራበትን የልማት ተቋማት ማቃጠልና መዝረፍ አልነበረም፡፡ እርግጥ ነው፤ ቀሳቃሾቻችን ትውልዱን ለማዳን ዛሬ የተከሰተውን አጀንዳ ማንሳታቸው ከስህተታቸው ተምረው ከሆነ ቁም ነገሩ የት እንዳለ መረዳታቸውን በከፊልም ቢሆን ስለሚያመለክት አካሄዱ መልካም በሆነ ነበር፡፡ ( ተምረው ከሆነ መገመት ስለሚያዳገት)፡፡ ነገር ግን ዛሬም የሚያሳዝነው ጉዳይ፤ የችግሩ መንስኤ ቴክኒክዊ የአሰረራ ግድፈት ወይም ቡድናዊ ጥቅመኝነት አልያም ግለሰባዊ ጉጉት መሆኑ በቅጡ ተተንትኖ ማብራርያ እስኪሰጥ ድረስ እንኳን መታገስ አቅቷቸው ችግሩን ወደ ብሔር አጀንዳ በመለወጥ የተለመደውን የጥላቻ መዝራት ለመርጨት ሲጣደፉ እየተመለከትን ነው፡፡ 
በዚህ ዓመት በተለይ የተከሰተው ችግር ጥልቀቱ እንደተጠበቀ ሆኖ፤ ከአንድ ወይም ከሌላው ብሔር ጋር ሲነጻጸር ለዩኒቨርስቲ የሚያበቃ ውጤት የሚያገኙት ተማሪዎች ቁጥር በአንጽራዊነት ከፍ ወይም ዝቅ ማለቱ የፈተና ባህርይ ነው፡፡ በተለይ ደግሞ በቁጥር ጥቂት ግን ከፍተኛ ውጤት በማስመዝገብ ረገድ እንደ ዛሬ በክልል የሚሰፈር ባይሆንም ወለጋዎችና ጎጃሞች ተጠቃሽ ናቸው፡፡ ይህ ደግሞ በኢትዮጵያ ታሪክ የተለመደ ክስተት ነው፡፡ ውጤቱ የሚመዘገበው ከተማሪዎች ጽናት፣ ከመምህራን ትጋት፣ ከትምህርት አሰጣጥ ሂደትና ከቀደምት ተማሪዎች ዝንባሌ መንጭቶ መሆኑ ደግሞ ግልጽ ነው፡፡ ለምሳሌ አዲስ አበባ ከሁሉም ክልሎች በቁጥር፣ በጥራትም ሆነ በብቃት የተሻሉ ትምህርት ቤቶች አሏት፡፡ ይህም ሆነ ግን በአንጻራዊነት የሁለተኛ ደረጃ ተማሪ ለዩኒቨርስቲ በማብቃት ረገድ የተለየ ውጤት የሚመዘገብባት ከተማ አይደለችም፡፡
እርግጥ ነው፡፡ በአንዳ አንድ ክልሎች የሚገኙ ትምህርት ቤቶች፣ የወረዳ እና የቀበሌ መስተዳድሮች በፈተና አሰጣጥ ሂደት ውስጥ ጣልቃ እየገቡ ተማሪዎች እንዲኮራረጁ ሁኔታዎችን በማመቻቸት በአንድ ወረዳ ወይም ቀበሌ ውስጥ የሚገኙ ትምህርት ቤት ተማሪዎች ከፍተኛ ውጤት እንዲያመጡ ሁኔታዎችን ማመቻቸት ባህል ከሆነ ዓመታት ተቆጥሯል፡፡ ይህም ሆኖ በአስር ሺዎች ተፈትነው በመቶ የሚቆጠሩ ተማሪዎች የተሻለ ውጤት ስላመጡ ብሔርን ተጠያቂ ማድረግና መውቀስ አሳፋሪ ድርጊት ነው፡፡ 
የዛሬዎቹም ሆነ የትናንቶቹ ኢህአዴጎች የትምህርት ስርዓታችን ጥራት በዚህ ደረጃ ከሰማይ ወደ ምድር እንዲፈጠፈጥ የበኩላችሁን ድርሻ መወጣታችሁ የማይካድ ሀቅ ነው፡፡ ከዚህ ተጠያቂነት ልታመልጡ አትችሉም፡፡ አዳዲሶቹ ታጋዮችና አክቲቪስቶች ነን ባዮች ግን እስከዛሬ የብሄር ፖለቲካ ሊወስዳችሁ የሚችለውን ርቀት ያህል በመሄድ እርስ በርሱ ልታጫርሱት የነበረው መጭ ትውልድ ተጨራርሶ አላልቅ ሲላችሁ የእውቀትና የትምህርት ጉዳናውን ሌላኛው የጥላቻ መርዝ መርጫ በማድረግ ትውልዱን ለሌላ ዙር ጥላቻና እልቂት ለማመቻቸት ሽር ጉድ ማለታችሁን ልታቆሙ ይገባል፡፡ ”መከበር በከንፈር” እንዲሉ የራሳችሁ ብሔር ክብር፣ ለሌላው ብሔር በምትሰጡት ክብር ላይ የሚመሰረት መሆኑን ለአፍታም ልትዘነጉት አይገባም፡፡ 
የሁለተኛ ደረጃ መልቀቂያ ፈተና ውጤት እንዲዛባ ያደረገ ሃይል፣ ቡድን፣ ተቋም ወይም ግለሰብ ካለ ለሕግ እንዲቀርብና ውጤቱ እንዲመረመር መታገል አግባብ ነው፡፡ ይህም ሆኖ ግን በጅምላ አንዱን ወይም ሌላውን ብሔር ተወቃሽ በማድረግ የጥላቻ መርዝ መነስነስችሁን ልታቆሙ ይገባል፡፡ አስር በመቶ ለማይሞላ ውጤት ”አንጸባራቂ ውጤት ተቀዳጀን” በሚል ከንቱ ውዳሴ ተጠምዳችሁ የላቀ ውጤት ለማግኝት ከመትጋትና ከመዘጋጀት ይልቅ ጉዳዩን ወደ ብሔር ብሽሽቅ በመግፋት የተጠመዳችሁ ኃይሎች ብሽሽቃችሁ ወዴት ሊያመራ እንደሚችል ከወዲሁ ተረድታችሁ ከሕዝብ ላይ እጃችሁን ብታነሱ ይበጃል፡፡ በብሔር ተቧድናችሁ የምትረጩት የጥላቻ፣ የቂም በቀል፣ የብሽሽቅ አዙሪት ውሎ አደሮ ከእልቂት በስተቀር ኢትዮጵያ ውስጥ አትራፊ ሃይል እንደማይፈጥር ከወዲሁ ልትረዱት ይገባል፡፡

ከአቶ ሞሼ ሰሙ ፌስ ቡክ የተወሰደ

Related stories   Another week, another scandal at the United Nations

Leave a Reply

Your email address will not be published. Required fields are marked *