የኦጋዴን ብሔራዊ ነጻ አውጭ ግንባር / ኦብነግ በመጪው ዓመት በሚካሄደው እንደሚሳተፍ ባስታወቀበት ወቅት ከጠቅላይ ሚኒስትር አብይ ጎን በመቆም የበኩሉን አስተዋጾ እንደሚያበረክት ይፋ አደረገ። የግንባሩ ከፈተኛ ካላፊዎች አዲስ አበባ በሰጡት ጋዜጣዊ መግለጫ “ለሶማሌ ሕዝብ ይታገል የነበረው ድርጅታቸው ከሌላው የሀገሪቱ ሕዝብ ተነጥሎ የሚያገኘው ነፃነት ትርጉም አልባ ነው” ሲል ተደምጧል።

ምርጫው ፍትሀዊ፣ ሀቀኛ እና ለሰላም የሚበጅ ይሆናል ብለው ተስፋ እንደሚያደርጉ፣ ግንባሩ የተጀመረውን ለውጥ ለማስቀጠል ከኢትዮጵያ ጠቅላይ ሚኒስትር ዶክተር ዐቢይ አህመድ ጎን በመቆም የበኩሉን ድርሻ እንደሚወጣም ያመከቱት የኦብንግ አመራሮች ጊዜው የግሎባይላይዜሽን ዘመን መሆኑንን እንደተናገሩ የዘገበው የጀርመን ድምጽ ሬዲዮ ነው።

የድርጅቱ ሊቀመንበር አቶ አብዱራህማን ሼህ ማህሊ ባደረጉት ንግግር ምርጫው በተያዘለት የጊዜ ቀጠሮ መሠረት መካሄድ እንደሚኖርበት ይህ የማይሆን ከሆነ ደግሞ እውነተኛ እና የሁሉም ብሔረሰቦች ውክልና ያለው የፌደራል የሥልጣን ክፍፍል ሊኖር እንደሚገባ አመልክተዋል።

ኦብነግ በሀገር አቀፍ ደረጃ ለመንቀሳቀስ ለምን አስፈለገው በሚል ከጋዜጠኞች ለቀረበ ጥያቄ ምላሽ የሰጡት የድርጅቱ የሥራ አስፈጻሚ ኮሚቴ አባል እና የአዲስ አበባ ተጠሪ አቶ ሀሰን መአሊን ፤ ከዚህ በፊት ለሶማሌ ሕዝብ ይታገል የነበረው ድርጅታቸው ከሌላው የሀገሪቱ ሕዝብ ተነጥሎ የሚያገኘው ነፃነት ትርጉም አልባ ነው ብለዋል።

«ከአሁን በፊት ለሶማሌ ሕዝብ ነበር የምንታገለው፤ በዓለም ደረጃ ያለው የፖለቲካ ሁኔታ (ዓለም እኮ ግሎባል ቪሌጅ ሆናለች) ስለዚህ የሁሉም የፖለቲካ ሁኔታ ስለተቀየረ በየጊዜው ጥናት እናደርጋለን። እና ይህ ጥናት የሚያሳየው ሎጂክም አይደለም ለሶማሌ ሕዝብ ብቻ ታግለን ኦሮሞ ወንድሞቻችንን፣ አፋር ወንድሞቻችንን፣ አማራ ወንድሞቻችን እና ሌሎችም የኢትዮጵያ ወንድሞቻችን ለየብቻ ተነጥለው የሶማሌ ሕዝብ ብቻ ወይም ኦጋዴ የሚኖረው ሕዝብ ብቻ የራሱን ፍትህ እኩልነት እና ነፃነት ካገኘ ሌላውስ? ይህ ሎጅክ አይደለም። »ላለፉት መቶ ዓመታት የሶማሌ ሕዝብ ዕጣ ፈንታ አዲስ አበባ ላይ ይወሰን ነበር ያሉት የኦብነግ ሊቀመንበር በበኩላቸው አሁን በዚህ ረገድ ሚና እንዲኖራቸው እንደሚፈልጉ አመልክተዋል።

ከዚህም በተጨማሪ ኦብነግ የክልሉ ሰላም እና ፀጥታ እንዲረጋጋ፤ የሕዝቡም ፍትሃዊ ተጠቃሚነት እንዲረጋገጥ እንደሚሠራም ሊቀመንበሩ መናገራቸውን የጀርመን ድምጽ ዘግቧል።

Related stories   አደዋ -የሚኒልክ እጅ ስራ !!!

Leave a Reply

Your email address will not be published. Required fields are marked *