ኢህአዴግ በመጭው ምርጫ በመዋሃድ እንደሚወዳደር ጠቅላይ ሚኒስትሩ ደቡብ ኮሪያ ለሚኖሩ ኢትዮጵያዊያን አረጋገጡ፡፡ የህግ የበላይነትን ለማስከበር መጀመሪያ የሞራል ልዕልና ላይ መሥራት እንደሚገባ ጠቅላይ ሚኒስትሩ አስገንዝበዋል።

ጠቅላይ ሚኒስትር ዐብይ አሕመድ (ዶክተር) በደቡብ ኮሪያ ሴዑል ከሚኖሩ ኢትዮጵያዊያን ጋር በሀገራዊ ጉዳዮች ላይ ዛሬ መክረዋል፡፡ በምክክሩም ከደቡብ ኮሪያ ሳይንስና ቴክኖሎጂ ኢንዱስትሪዎች ጋር የውጭ ቀጥታ ኢንቨስትመንት ላይ መስራት እንደሚገባ ተነስቷል፡፡

የአረንጓዴ አሻራን እንዲሁም በኤርትራ እና ሱዳን ላይ የተሠሩትን ዲፕሎማሲያዊ ተግባራት ኢትዮጵያዊያኑ አድንቀዋል። በኢትዮጵያ ታሪክ ላይ መግባባት እንዲቻል መሠራት አለበት ያሉት ኢትዮጵያዊያኑ ህግ ማስከበር ላይ ሊሰራ እንደሚገባም አሳስበዋል፡፡ የትምህርት ሂደቱ ተግባር ላይ ማተኮር ቢችል የተሻለ እንደሆነም ጠይቀዋል፡፡

ኢትዮጵያዊያኑ ምርጫው ይካሄዳል ወይስ አይካሄድም? ለሚለው ጥያቄም ተገቢ ምላሽ እንዲቀርብላቸው ጠይቀዋል። ጠቅላይ ሚኒስትሩ በፖለቲካዉ ውስጥ እኔ ብቻ አውቅልሃለሁ ማለት ተገቢ አለመሆኑንና የዴሞክራሲ ልምምድ መቀጠል እንዳለበት ተናግረዋል።

ምርጫው እንደሚካሄድና ኢህአዴግም በመዋሃድ እንደሚወዳደር አረጋግጠዋል፡፡

የህግ የበላይነትን ለማስከበር መጀመሪያ የሞራል ልዕልና ላይ መሥራት እንደሚገባም ነው ዶክተር ዐብይ ያስገነዘቡት። የትምህርት ፖሊሲው እየተከለሰ መሆኑን ያነሱት ጠቅላይ ሚኒስትሩ በትምህርት ላይ የሚነሱ ጥያቄወችን እንደሚፈታ እና ከግብረ ገብነት ጀምሮ የክህሎት ሰልጠናዎችን እንደሚያካትትም አስታውቀዋል።

ኢንዱስትሪውን በተመለከተ ማብራሪያ የሰጡት ጠቅላይ ሚኒስትር ዐብይ አሕመድ (ዶክተር) “የአንዱስትሪው ግንባታ አሁንም ግብርና ተኮር ነው፤ ነገር ግን መዘመን አለበት” ነው ያሉት። ቱሪዝም ላይ ያለው ሀብት እንዲዳብርም እየተሰራ ነው ብለዋል ጠቅላይ ሚኒስትሩ፡፡

በጽዮን አበበ አማራ መገናኛ ብዙሃን

Related stories   ባንኮች በሁለት ሳምንት ውስጥ ከ100 ሚሊዮን ዶላር በላይ መንዝረዋል

Leave a Reply

Your email address will not be published. Required fields are marked *