ኢትዮ ቴሌኮም በተለያዩ ሃገራት ከሚገኙ ኦፕሬተሮች ጋር ድርድር በማድረግ የሮሚንግ አገልግሎት ላይ ማሻሻያ ማድረጉን አስታወቀ። የሮሚንግ አገልግሎት ደንበኞች ለስራ ወይም ለግል ጉዳይ ወደተለያዩ ሃገራት ሲጓዙ ሃገር ውስጥ በሚጠቀሙበት የተንቀሳቃሽ ስልክ ቁጥራቸው አማካኝነት አገልግሎት እንዲያገኙ የሚያስችል ነው።

ቀደም ሲል ከተለያዩ የቴሌኮም ኦፕሬተሮች ጋር የነበረው የስራ ግንኙነት አገልግሎቱን በተመጣጣኝ ዋጋ ለማቅረብ የማያስችል መሆኑ የአገልግሎቱን ክፍያ ከፍ አድርጎት ቆይቷል። ይህን ተከትሎም ደንበኞች ለሮሚንግ አገልግሎት የሚከፍሉት ክፍያ ከፍተኛ ነው በሚል ቅሬታ ሲያቀርቡ ቆይተዋል።

ኢትዮ ቴሌኮምም በተለያዩ ሃገራት ከሚገኙ ኦፕሬተሮች ጋር የነበረውን የአሰራር ክፍተት በመፈተሽ ላለፉት ወራት ድርድር ሲያደርግ ቆይቷል። አሁን ላይም በ56 ሃገራት ከሚገኙ 73 ኦፕሬተሮች ጋር ስምምነት ላይ በመድረስ የሮሚንግ አገልግሎት ላይ የክፍያ ማሻሻያ ተደርጓል።

በዚህም መሰረት በኢንተርኔት እስከ 99 ነጥብ 9 በመቶ፣ በድምጽ እስከ 89 በመቶ እንዲሁም በአጭር የፅሁፍ መልዕክት እስከ 94 በመቶ የክፍያ ማሻሻያ ማድረጉን ከኢትዮ ቴሌኮም ያገኘነው መረጃ ያመላክታል።

(ኤፍ ቢ ሲ)

Related stories    ኬንያ ለመጀመርያ ጊዜ ያልተጣራ ድፍድፍ ነዳጅ ወደ ውጭ ላካች፡፡

Leave a Reply

Your email address will not be published. Required fields are marked *