“ኢትዮጵያን ለማጥቃት ያሰበ ሀይል በደቡብ ሱዳን በኩል ሊመጣ ቢያስብ እንኳ ቀድሞ የሚጋፈጠው ደቡብ ሱዳናውያንን ነው፤ በየትኛውም ሁኔታ ውስጥ ደቡብ ሱዳን ከኢትዮጵያ ጎን እንደምትሰለፍ አረጋግጣለሁ” በሚል በኢትዮጵያ የደቡብ ሱዳን አምባሳደር ጀምስ ፒፒያ ሞርጋን መናገራቸውን ተከትሎ የግብጽ ሚዲያዎች ጭፈራቸው ወደ ማላዘን ተቀይሯል።

በኢትዮጵያ የደቡብ ሱዳን አምባሳደር ጀምስ ፒፒያ ሞርጋን

በአገራቸውና በአባይ ጉዳይ ፍጹም ልዩነት የማያሳዩት ግብጻውያን ” አዲስ ስጋት ” ሲሉ ባለፉት ሁለት ቀናት ሲያሽካኩና ኢትዮጵያ የማትወጣው ችግር ውስጥ መግባቷን ሲያውጁ ነበር። በኢትዮጵያና ሱዳን ድንበር ጦርነት ተቀሰቀሰ፣ የሱዳን ከፍተኛ የጦር መኮንን መገደላቸው እሳቱን የሚያቀጣጥል ነው? ሱዳን ይህንን ግጭት ተከትሎ አዲስ የጦር አዝዥ ሾመች የሚሉ የጦርነት አዋጅ ሲፋፍሙ ነበር።

እያደር አዳዲስ ዜናዎች የሚሰሙበት የህዳሴ ግድብ ጉዳይ ሱዳንና ኢትዮጵያ በድንበር አካባቢ ተፈጥሮ የነበረውን ግጭት ለማርገብ መስማማታቸው፣ የወሃ ሚኒስትሮቹ በቴክኒካል ጉዳዮች መግባባት ላይ መቃረባቸው ዜና በሆነ ማግስት ተቀማጭነታቸው በአዲስ አበባ ያደረጉት የደቡብ ሱዳን አምባሳደር ጀምስ ፒፒያ ሞርጋን “ኢትዮጵያን ለማጥቃት ያሰበ ሀይል በደቡብ ሱዳን በኩል ሊመጣ ቢያስብ እንኳ ቀድሞ የሚጋፈጠው ደቡብ ሱዳናውያንን ነው” ማለታቸውን ተከትሎ ግብጾች የውስጥ ባንዳዎችን ማባበሉ እንደሚያዋጣቸው የተቀበሉ ይመስላል።

ደቡብ ሱዳን በየትኛውም መንገድ ኢትዮጵያን የሚጎዳ ተግባር መፈፀም እንደማትችል አምባሳደር ጀምስ ፒፒያ ሞርጋን ማረጋገጫ ሰጥተዋል።

አምባሳደር ጀምስ ፒፒያ ሞርጋን ይህን ያሉት ደቡብ ሱዳን ከሰሞኑ ለግብጽ የጦር ሰፈር እንድትገነባ ፈቃድ ሰጥታለች በሚል የሚናፈሰው መረጃ  አስመልክቶ በዛሬው እለት መግለጫ ሲሰጡ ነው። በትናትናው እለት የጽሁፍ መግለጫ ማሰራጨታቸው አይዘነጋም።

አምባሳደሩ በመግለጫቸው ከሰሞኑ ደቡብ ሱዳን ለግብፅ በፓካግ የጦር ሰፈር እንድትገነባ መሬት ሰጥታለች የተባለው ፍፁም ሀሰት እንደሆነ አስረግጠው ተናግረዋል። መረጃውን የሚያሰራጩ ቡድኖች የሁለቱን ሀገራት ትብብር የማጠልሸት ፍላጎት ያላቸው ናቸው ብለዋል።

ደቡብ ሱዳን ችግር ለይ በወደቀችበት ጊዜ ሁሉ ኢትዮጵያ ከጎና አለች ያሉት አምባሳደሩ፥ ይህንን ውለታ ደቡብ ሱዳናውያን መቼም አይዘነጉትም ሲሉ ወደሁዋላ ተመልሰው የወንድምነትን ፍሬ ቆጥረዋል። አክለውም ኢትዮጵያ ችግሮችን በውይይት እንደምትፈታ እምነት አንዳላቸውም ገልፀዋል። በየትኛውም ሁኔታ ውስጥ ግን ደቡብ ሱዳን ከኢትዮጵያ ጎን እንደምትሰለፍ አረጋግጠዋል።

Related stories   ኢሊዩድ ኪፕቾጌ የአለም ማራቶን ሪከርድን አሻሻለ

ኢትዮጵያን ለማጥቃት ያሰበ ሀይል በደቡብ ሱዳን በኩል ሊመጣ ቢያስብ እንኳ ቀድሞ የሚጋፈጠው ደቡብ ሱዳናውያንን ነው ሲሉም ተናግረዋል።ደቡብ ሱዳን ኢትዮጵያ በራሷ ግዛት የራሷን ተፈጥሯዊ ሀብት የመጠቀም መብቷን ሙሉ በሙሉ እንደምታከብምርም አምባሳደሩ ገልፀዋል።

የደቡብ ሱዳን የውጭ ጉዳይ እና ዓለም አቀፍ ትብብር መስሪያ ቤት በትናንት ባወጣው መግለጫ ጁባ ግብፅ በፓጋክ አካባቢ የጦር ሰፈር ትገነባ ዘንድ ይሁንታ ሰጥታለች በሚል እየተናፈሰ ያለው ወሬ ከእውነት የራቀ እና መሰረተ ቢስ መሆኑን መግለፁ ይታወሳል።

መንግስት በዚህ ሳይዘናጋ የዲፕሎማሲ ጥረቱን እንዲገፋበት፣ አቅም ያላቸው ዜጎችም ድጋፍ እንዲያደርጉ፣ በባንዳነት የተሰለፉም እጃቸውን እንዲሰበስቡ ዜጎች በየመስኩ እየወተወቱ ነው።

የ FBC ዘገባ ለመነሻነት ተጠቅመናል

Leave a Reply

Your email address will not be published. Required fields are marked *