የሲሚንቶ አምራቾች ከታኅሣስ 30/2012ዓ.ም በፊት በነበረው ዋጋ እንዲያስረክቡ የንግድና ኢንዱስትሪ ሚኒስቴር አሳሰበ፤ ቸርቻሪዎችም በኩንታል 20 ብር ጭማሪ አድርገው እንዲሸጡ ተብሏል፡፡
በሀገሪቱ የተከሰተውን የሲሚንቶ ዋጋ መናር ተከትሎ ጥናት ላይ የተመሠረተ የአቅርቦትና የስርጭት ማስተካከያ ማድረጉን የንግድና ኢንዱስትሪ ሚኒስቴር ገለጸ፡፡
በቅርቡ በሀገሪቱ የተከሰተውን የሲሚንቶ ዋጋ መናር ተከትሎ አሠራሩን በማጥናት ስርጭቱንና ዋጋውን በማረጋጋት ወደ ነበረበት ለመመለስ በመንግሥት በኩል አቅጣጫ ተቀምጦ እንቅስቃሴዎች መጀመሩን በንግድና ኢንዱስትሪ ሚኒስቴር የኮሙኒኬሽን ጉዳዮች ዳይሬክተር ወንደሙ ፍላቴ አስታውቀዋል፡፡
ላለፉት ቀናት ተቋርጦ የነበረውን የሲሚንቶ ምርት አስመልክቶ በተደረገው ጥናት ምርቱን የመንግሥት የልማት ድርጅቶች እና ፋብሪካዎች ተመርጠው አገልግሎት ሲሰጡ ለነበሩ አከፋፋዮች በኮታ በማከፋፈል ማስቀጠል አስፈላጊ መሆኑን ገልጸዋል፡፡
በዚህም መሠረት በየዕለቱ 340 ሺህ 238 ኩንታል የሲሚንቶ ምርት ከፋብሪካዎች የሚነሳ ሆኖ ምርቱን በመንግሥት ልማት ድርጅቶችና በግል አከፋፋዮች በእኩል መጠን በማከፋፈል በሚሰጣቸው የኮታ ድልድል መሠረት ስርጭቱ መቀጠል እንዳለበት፣ የምርት መሸጫ ዋጋን በተመለከተ ተጨማሪ ዕሴት ታክስን ጨምሮ አከፋፋይ ድርጅቶች በመንግሥት በተወሰነላቸው የትርፍ ኅዳግ ብቻ ማከፋፈል እንዳለባቸው፣ ዕለታዊ የስርጭትና የሽያጭ አፈጻጸም ሪፖርት በሰነድ ተደግፎ ለሚኒስቴር መሥሪያ ቤቱ መላክ እንዳለበት ተገልጿል፡፡
የመሸጫ ዋጋና የትርፍ ኅዳግን በሚመለከትም የስሚንቶ ምርት ዋጋ በሁሉም ፋብሪካዎች የተለያየ ስለሆነ አምራቾች ከታኅሣስ 30/2012 ዓ.ም በፊት በነበረው ዋጋ መሸጥ እንዳለባቸውና ቸርቻሪዎች ደግሞ ከገዙበት ዋጋ ላይ በአንድ ኩንታል 20 ብር ትርፍ ጨምረው መሸጥ እንዳለባቸው ተገልጿል፡፡ በዘላቂነት የአሠራር መመሪያ እየተዘጋጀ ስለሆነ በፍጥነት ጸድቆ ተግባራዊ እንደሚደረግም ተብራርቷል፡፡ በመንግሥት ከተወሰነው ዋጋ በላይ በሚሸጡ በማናቸውም ድርጅቶች ላይ የማያዳግም ርምጃ የሚወሰድ መሆኑንም ዳይሬክተሩ ገልጸዋል፡፡
ምንጭ፡- የንግድና ኢንዱስትሪ ሚኒስቴር
Related stories   የኦሮሚያ ክልል ከ700 ሺህ በላይ ተፈናቃዮችን ወደ ቀያቸው መመለሱን ገለጸ

Leave a Reply

Your email address will not be published. Required fields are marked *