ግብፅ እና እኛ!
በዶ/ር እንዳላማው አበራ
በልጅነታችን የሰማናት አንዲት ቅኔ ነበረች፡፡ ደራሲዋ ማን እንደሆነ ባላስታውስም መልዕክቷ ግን አሁንም ትክክል ይመስለኛል፡፡ በእርግጥ ደራሲው ግብፆች ሲል በተለያዩ ዘመናት በገዥነት መንበር ላይ የነበሩትንና ያሉትን የግብፅ መንግሥታት እያለ መሆኑን ልናሰምርበት ይገባል፡፡ እንዲህ ትላለች፡
በባቡር ተጉዘን ምንድነው ቅልውጡ፣
ግብፆች ለሃበሻ ደግሰው ላይሰጡ፡፡
በመንግሥቱ ኃይለማርያም ዘመን “ታሪካዊ ጠላቶቻችን” ተብለው በኮድ የሚጠቀሱት ግብፅና በዙሪያዋ ያሰለፈቻቸው የአረብ አገሮች እንደነበሩ ብዙዎች ይስማሙበታል፡፡
የግብፅ መንግሥታት ኢትዮጵያ ድህነትን ሰብራ ከወጣች የአባይን ውኃ ልትቀንስብን ወይም ፈጽሞ ልትገድብብን ትችላለች በሚል ስጋት ውስጥ እንደኖሩ፣ ያንን ለማስቀረት ደግሞ ኢትዮጵያ ዘለዓለም ስትበጠበጥ እንድትኖር ማድረግን እንደ ቋሚ ስልት እንደሚጠቀሙበት እናውቃለን፡፡ ይህንን አቋማቸውን ለማብራራት መሞከር ከንቱ ድካም ነው፡፡ ይልቅስ ትኩረታችን እኛ ምን እናድርግ በሚለው ጥያቄ ሊሆን ይገባል፡፡
ምን እናድርግ?
1. የግብፅን ሕዝብ በውኃ ጥም የመፍጀት ፍላጎት የለንም፤ ሊኖረንም አይችልም፡፡ በጤናማ አዕምሮ ሊታሰብ የማይችል ነገር ነው፡፡ ይህን ነገር እዚህ ሳመጣው “ፀሐይ በምሥራቅ ትወጣለች” ብሎ እንደመናገር ሊቆጠር ይችል ይሆናል፤ ግን አይደለም፡፡ በግል ካገኘኋቸው ግብፃዊያን የተረዳሁት ነገር ቢኖር ለዘመናት ሲሰሙት በኖሩት ዜማ ምክንያት ‘ኢትዮጵያ አንድ ቀን ውኃውን ልታስቆምብን ትሞክር ይሆን?’ በሚል ስጋት ውስጥ እንዳሉ ነው፡፡ ስለዚህ ይህን መልዕክት ይዘን፣ ፖለቲከኞችን አልፈን ወደ ሕዝቡ የምንደርስበት መንገድ መፈለግ አለበት፡፡
2. በእኔ ትዝብት አብዛኛው የግብፅ ሕዝብ ስለአባይ ውኃ ምንጭ ያለው ዕውቀት ደካማ ነው፡፡ (በእርግጥ የእኛ ሕዝብም [ራሴን ጨምሮ] የተሟላ ዕውቀት አለው ለማለት ይከብዳል፡፡] ይህን ክፍተት ለመሙላት በአረብኛ ቋንቋ ቀላልና ግልጽ መልዕክቶች የምናስተላልፍበት ስልት ተቀይሶ ሰፊ ሥራ መካሄድ አለበት፡፡
3. በኢትዮጵያ የፖለቲካ ኃይሎች መካከል ብሔራዊ መግባባት መፍጠር በአባይ ጉዳይ ዙሪያ በአንድ ልብ ለመንቀሳቀስ ስለሚረዳ ከፍተኛ ትኩረት ሊሰጠው ይገባል፡፡ የተራዘመውን ምርጫ ለዚህ ተግባር ብንጠቀምበት ለትውልዶች የሚተርፍ ውጤት እንደምናገኝ እተማመናለሁ፡፡ እዚህ ላይ “በአባይ ዙሪያ አንድ አይነት አቋም ይኑረን” የሚለው ብቻ በቂ አይደለም ብዬ አምናለሁ፡፡ ሰላማዊ የፖለቲካ ምሕዳር ካልኖረን ለጣልቃ ገብነት የተመቻቸን ስለምንሆን ብሔራዊ መግባባቱ ያንን ምሕዳር ለመፍጠር ያለመ መሆን አለበት፡፡
Related stories   የህዝብ እና የተቃዋሚ ፓርቲዎች መንታ መንገድ

Leave a Reply

Your email address will not be published. Required fields are marked *