በሲሚንቶ ምርትና ግብይት ላይ የታየውን የገበያ አለመረጋጋት ለመቅረፍ እየተሠራ ያለው ሥራ አበረታች እንደሆነ የንግድና ኢንዱስትሪ ሚኒስቴር አስታወቀ፡፡የንግድና ኢንዱስትሪ ሚኒስትር መላኩ አለበል ከክልልና ከተማ አስተዳደር ንግድ ቢሮ ኃላፊዎች፣ የሲሚንቶ አምራቾችና አካፋፋዮች ጋር ውይይት ተወያይተዋል፤ በውይይታቸውም የሲሚንቶ አቅርቦትና ስርጭት ችግርን ለመፍታት በሚኒስቴር መሥሪያ ቤቱ ኮሚቴ ተዋቅሮ ለፋብሪካዎች የማምረት አቅም ማነስ ምክንያት የሆኑ ችግሮችን ለይቶ ቅድሚያ የሚሰጣቸውን ችግሮች ለመፍታት እየሠራ መሆኑን ተናግረዋል፡፡
በተለይም የሲሚንቶ ማከፋፈልን በተመለከተ የፋብሪካዎችን ወቅታዊ የማምረት አቅም መሠረት በማድረግ ጊዜያዊ ችግሮችን ለመፍታት በተሰጠ አቅጣጫ መሠረት አምስት የመንግሥት የልማት ድርጅቶችን ወደ ስርጭት እንዲገቡ በማድረግና በፋብሪካዎች የተመረጡ የግል አከፋፋዮችን ሕጋዊነትና የቀድሞ መረጃዎች በማጣራት ከመንግሥት የልማት ድርጅቶች ጋር በእኩል ምርቶችን እየገዙ ለህብረተሰቡ እንዲያከፋፍሉ መደረጉን አቶ መላኩ ገልፀዋል፡፡
በየዕለቱ ከፋብሪካዎች ተመርተው የወጡ ምርቶችን ስርጭት በመከታተል የተከናወኑ ተግባራትን፣ ያጋጠሙ ችግሮችን የተጠቃለለ የሪፖርት ግንኙነት በመዘርጋት አፈፃፀሙን በትኩረት የመከታተል፣ የመደገፍና የመምራት ሥራ እየተሠራ መሆኑንም አስታውቀዋል፡፡
ከምርት እስከ ስርጭት ያለውን የሲሚንቶ የግብይት ሥርዓት በመዘርጋት ምንም እሴት ሳይጨምሩ ኩፖን ብቻ በመሸጥ በሲሚንቶ ዋጋ ላይ ከፍተኛ ጭማሪ ሲያደርጉ የነበሩ ሕገ-ወጥ ደላሎች እንዲወገዱ በማድረግ የችርቻሮ ዋጋ በአንፃራዊነት ወደነበረበት እንዲመለስ የማድረግ ሥራ መሠራቱን አቶ መላኩ አስረድተዋል፡፡
በቀጣይ የፋብሪካዎችን የማምረት አቅም የሚገድቡ ተግባራትን ጥብቅ ክትትል በማድረግ ምርትና ምርታማነትን ለማሳደግና በአካባቢያቸው የኢንዱስትሪ ሰላምና ፀጥታን ማስጠበቅ እንዲሁም ሕጋዊ አከፋፋዮችን በመከታተል ከሕጋዊ የስርጭት መስመር እና ወቅታዊ የሽያጭ ዋጋ በላይ በሚሸጡ ላይ ንግድ ፈቃድ ማገድና መሰረዝ፣ እንዲሁም በሕግ ተጠያቂ የማድረግ ርምጃዎች እንደሚወሰዱ ሚኒስትሩ ማስጠንቀቃቸውን የንግድነ ኢንዱስትሪ ሚኒስቴር አስታውቋል፡፡
Amara massemedia
Related stories   የገንዘብ እጥረት ቀውስ በኢኮኖሚው ላይ ሥጋት መደቀኑን መንግሥት አመነ-

Leave a Reply

Your email address will not be published. Required fields are marked *