ጠቅላይ ሚኒስትር ዐቢይ አሕመድ ለይፋዊ የስራ ጉብኝት አስመራ መግባታቸው ታውቋል።  ኤርትራው የማስታወቂ ሚኒስትር የማነ ገብረመስቀል በትዊተር ገጻቸው እንዳስታወቁት ጠቅላይ ሚኒስትሩ አስመራ አውሮፕላን ማረፊያ ሲደርሱ የኤርትራው ፕሬዚዳንት ኢሳያስ አፈወርቂ አቀባበል አድርገውላቸዋል።
ጠቅላይ ሚኒስትሩ በአስመራ ቆይታቸው ከኤርትራው ፕሬዚዳንት ኢሳያስ አፈወርቂ ጋር በሃገራቱ የሁለትዮሽ ግንኙነት እና በቀጠናዊ ትብብር ዙሪያ ይወያያሉ ተብሎ እንደሚጠበቅ የመንግስት ሚዲያዎች ገልጸዋል።  የውጭ ጉዳይ ሚኒስትር ዲኤታ አቶ ሬድዋን ሁሴን እና የህዝብ ተወካዮች ምክር ቤት አፈ ጉባኤ አቶ ታገሰ ጫፎ አብረው ወደ አስመራ ማቅናታቸውንም አስታውቀዋል።
የህወሃት ደጋፊዎችና የማህበራዊ ሚዲያ ወትዋቾች የአብይ አህመድ ድንገተኛ የአስመራ ጉብኝት ዜና እንደወትሮው ሁሉ እያብጠለተሉት ይገኛሉ። ኤርትራ በአልጀርሱ ስምምነት መሰረት ባድመን ለኤርትራ እንድትሰጥ እነ መለስ ተስማምተው የፈረሙበትን ስምምነት ተጋራዊ እንዲያደርጉ ጽኑ ፍላጎት እንዳላት ሰሞኑንን በስፋት እየተነገረ መሆንን የሚያስታውሱም አሉ።
ለውጡ ይፋ ከመሆኑ በፊት የኢህአዴግ ስራ አስፈጻሚና ምክር ቤት የአልጀርሱ ስምምነት ተጋራዊ እንዲደረግና ከኤርትራ ጋር ሰላም እንዲወርድ በሙሉ ድምጽ መስማማቱ ይታወቃል። ይህንኑ መሰረት አድርጎ የተጀመረው የሁለቱ አገራት ስምምነት ወደ ተፈለገው ደረጃ ያላደገው ኤርትራ ያቀረበችው በህግ ውሳኔ የተደገፈ ጥያቄ ተግባራዊ ባለመደረጉ እንደሆነ የሚገልጹ አሉ። በሌለ በኩል ደግሞ የድንበሩን መከፈት ተከትሎ በኤርትራ መንግስትን የማንገዳገድ ሙከራና ሃሳብ ከህወሃት ዘንድ በመታየቱ እንደሆነ ውስጥ አዋቂ ነን የሚሉ እየገለጹ ነው። ሁሉም ሆኖ ግን ህወሃትና ኢትዮጵያን እያስተዳደረ ያለው መንግስት በግልጽ ፖለቲካዊ ፍጥጫቸው ባየለበት በዚህ ሰዓት ጠቅላይ ሚኒስትር አብይ ወደ አስመራ ማቅናታቸው የሁሉንም ቀልብ የሳበ ሆኗል።
የኤርትራው ፕሬዚዳንት ኢሳያስ አፈወርቂ ባለፈው ሚያዚያ ወር ላይ በኢትዮጵያ ይፋዊ የስራ ጉብኝት ማድረጋቸው ይታወሳል፡፡ ወቅቱ ኢሳያስ ሞተዋል የሚለውን ዜና የህወሃት አፍቃሪ ሚዲያዎች በስፋት እያራገቡ ባለበት ወቅት ሲሆን የተለያዩ የልማት ስራዎችን ሲጎበኙ መታየታቸው ጤናማ መሆናቸውን ለወዳጅም ለጠለትም ለማሳየት ታስቦ እንደሆነ መጠቆሙ ይታወሳል።
ኢትዮጵያና ኤርትራ በመከላከያና በደህንነት የሁለትዮሽ የጋራ ስምምነት የተፈራረሙ አገሮች መሆናቸውም አይዘነጋም።
Related stories   "በተለመደው የህግ አግባብ የሚፈጽም የፌደራልና የክልል መንግስት የለም" ጠ/አቃቤ ህግ ጌታቸው አምባዬ " ጋዜጠኞች አዋጁን አሳለፉት"

Leave a Reply

Your email address will not be published. Required fields are marked *