“የአስም በሽተኛ ነኝ” ሲል ልደቱ አያሌው የጠየቁት የዋስትና መብት ውድቅ ሆነ

የኢዴፓ አመራር አቶ ልደቱ አያሌው ዛሬ ፍርድ ቤት ቀርበዋል። በኦሮሚያ ቢሾፍቱ ወረዳ ፍርድ ቤት ባስቻለው ችሎት የጠየቁት የዋስትና መብት ውድቅ ተደርጎ ፖሊስ የጠየቀው ተጨማሪ የ14 ቀን ቀጠሮ ተፈቅዷል።
 
ሰኔ 23 ቀን 2012 ዓ.ም ቢሾፍቱ ውስጥ ለወጣቶች ገንዘብ በመስጠት ለብጥብጥ እና አመፅ አነሳስተዋል በሚል ፖሊስ በወንጀል እንደጠረጠራቸው ለችሎት አስረድቷል።
 
አቶ ልደቱ አርብ ከማለዳው አራት ሰዓት ላይ በቁጥጥር ስር መዋላቸውን ያስረዳው ፖሊስ በወቅቱ  ሁለት ሽጉጦች እንዳገኘባቸውና በኢግዚቢት እንደያዛቸው ገልጿል። አያይዞም የሰው እና የሰነድ ማስረጃ ለማቅረብም የ14 ቀናት ተጨማሪ የምርመራ ጊዜ እንዲፈቀድለት ጥይቋል። ፖሊስ አገኘሁዋቸው ያላቸው ሽጉጦች ፈቃድ ይኑራቸው አይኑራቸው አላብራራም።
 
በአመጽ ማነሳሳት ተጠርጥረው ታስረው ፍርድ ቤት የቀረቡት አቶ ልደቱ  ቋሚ አድራሻቸው በአዲስ አበባ ኮልፌ ቀራንዮ ክፍለ ከተማ በመሆኑ፣ መታወቂያቸውም በዚያው ስለተመዘገብ ለፌደራል ፍርድ ቤት መቅርብ እንዳለባቸው ጠይቀዋል። በቢሾፍቱ ያላቸው ቤት ጊዚያዊ መሆኑንን  በመግለፅ በፌደራል ፍርድ ቤት ጉዳያቸው እንዲታይ  መቃወሚያ አንስተዋል።
 
ለዓመት በፊት የልብ ቀዶ ጥገና ወዳደረጉበት/ አሜሪካ/  ሀገር በዛሬው ቀን አራት ሰዓት ላይ ለመብረር  በዝግጅት ላይ እንዳሉ መያዛቸውንና ለማስረጃም ትኬት ያላቸው መሆኑንን፣ ከዚህም በላይ የአስም በሽተኛ መሆናቸውን ለፍርድ ቤቱ አስረድተዋል። የእስር አያያዙም ለኮቪድ-19 እንዳያጋልጠኝ ያሰጋኛል በማለት ይህ ታሳቢ ተደርጎ በዋስ እንዲፈቱ ጠይቀዋል።
 
መርማሪ ፖሊስ የእስር አያያዛቸው ምቹ እና ጥንቃቄ ያለው መሆኑን እና ከእስር ቢፈቱ ማስረጃ እንደሚሸሽበት በማሳወቅ ዋስትናውን ተቃውማል።
 
የሁለቱን ክርክር ያዳመጠው ፍርድ ቤቱ ጉዳያቸው በዚያው በቢሾፍቱ አይታይ በሚል ላቀረቡት ወንጀሉ የተፈፀመው በቢሾፍቱ በመሆኑ እና መኖሪያቸውም በዚያው በመሆኑ ፍርድ ቤቱ ጉዳዩን እዚያው የማየት ስልጣን እንዳለው በማስረዳት ጉዳዩ በችሎቱ መታየት እንደሚቀጥል ትእዛዝ ሰጥቷል።
 
የዋስትና ጥያቄውንም ውድቅ በማድረግ ለመርማሪ ፖሊስ ተጨማሪ 14 ቀን የምርመራ ጊዜ ፈቅዷል። የአቶ ልደቱ ጠበቃም የክልሉ የጥብቅና ፍቃድ ባለማቅረባቸው ጥብቅና ሳይቆሙላቸው ቀርቷል። ፍርድ ቤቱም ፍቃድ ከሌላቸው ማማከር እንደማይፈቀድላቸው ገልፆላቸዋል።
 
Print Friendly, PDF & Email
(Visited 1 times, 1 visits today)

Leave a Reply

Your email address will not be published. Required fields are marked *