ሪፖርተር – ከድምፃዊ ሃጫሉ ሁንዴሳ ግድያ ጋር በተያያዘ ከወር በፊት በቁጥጥር ሥር ውለው በምርመራ ላይ ያሉት አቶ በቀለ ገርባ፣ የእርስ በርስ ግጭት በማነሳሳትና ሌሎች ወንጀሎች እንደሚከሰሱ መወሰኑን ዓቃቤ ሕግ አስታወቀ፡፡

አቶ በቀለ የሃጫሉ ሞትን ምክንያት በማድረግ የተቀሰቀሰው ሁከትና ግጭት በራሱ በሕዝቡ የተመራ እንጂ እሳቸው ይህንን ማድረግ የሚያስችል ሠራዊት እንደሌላቸው ገልጸው መንግሥት ፍርድ ቤትን በመጠቀም ተቀናቃኙን ለማጥፋት እየሠራ መሆኑን ተናግረዋል፡፡

የፌዴራል ጠቅላይ ዓቃቢያነ ሕግ ባለፈው ማክሰኞ  በፌዴራል የመጀመርያ ደረጃ ፍርድ ቤት አራዳ ምድብ ልደታ ማስቻያ ጊዜ ቀጠሮ ችሎት ቀርበው እንደተናገሩት፣ ተጠርጣሪው አቶ በቀለ በምን እንደሚከሰሱ መወሰኑን ገልጸዋል፡፡ ክስ የሚመሠረትባቸው በፌዴራል ከፍተኛ ፍርድ ቤት መሆኑን፣ ክሱም የእርስ በርስ ግጭት በማነሳሳትና በሌሎች ወንጀሎች መሆኑን አስታውቀዋል፡፡

ፖሊስ የሕግ የበላይነትን ለማስከበር ቀድሞ የሕግ የበላይነትን እራሱ ሊያከብር ይገባል! (ኢዜማ) የተሰጠ መግለጫ

የፌዴራል ጠቅላይ ዓቃቤ ሕግ ድንበር ተሻጋሪ ወንጀሎች ዳይሬክተር አቶ ፈቃዱ ፀጋና ዓቃቤ ሕግ ኤፍሬም ኃይሉ በችሎት ተገኝተው ተጠርጣሪው ስለሚከሰሱበት የወንጀል ዓይነት ከመናገራቸው በፊት፣ ላለፉት 35 ቀናት በተጠርጣሪው ላይ ምርመራ ሲያደርግ የከረመው የፌዴራል ፖሊስ ወንጀል ምርመራ ቡድን በተፈቀደለት ስምንት ቀናት ውስጥ የሠራቸውን የምርመራ ክንውኖች ለፍርድ ቤቱ ሪፖርት አቅርቧል፡፡

መርማሪ ቡድኑ የድምፃዊ ሃጫሉን ግድያ ምክንያት በማድረግ በተጠርጣሪው አማካይነት በአዲስ አበባ ከተማና በኦሮሚያ በተለያዩ አካባቢዎች በተፈጠረ አመፅ፣ በትራንስፖርት ዘርፍ ከትራንስፖርት ሚኒስቴር 45 ገጽ የሰነድ ማስረጃ መሰብሰቡን ገልጿል፡፡ በዚህም 7.4 ሚሊዮን ብር የመንግሥትና 28 ሚሊዮን ብር የግል፣ በድምሩ 37,283,933 ብር ንብረት መውደሙን አስረድቷል፡፡

“እራሴን እንዳጠፋ ይፈቀድልኝ” ሲል ጠይቆ የነበረው ተጠርጣሪ ሃጫሉን ተኩሶ መግደሉን አመነ፤

በብርበራ የተገኙ የተጠርጣሪው ሁለት ሽጉጦችና ከግብረ አበሮቻቸው የተገኙ ሰባት ሽጉጦች በፎረንሲክ ተመርምረው፣ ከፋብሪካ ሥሪት ውጭ የውል ቁጥር እንዳላቸው የሚያረጋግጥ ሰነድ መሰብሰቡን አክሏል፡፡

አቶ በቀለ ወደ ሻሸመኔ ደውለው፣ ‹‹በሥልጣን ላይ ያለው መንግሥት እስከሚወድቅ ድረስ ትግሉ ይቀጥላል፤›› በማለት፣ ብሔርንና ሃይማኖት መሠረት ያደረገ የአመፅና የብጥብጥ ጥሪ መመርያ በማስተላለፋቸው 32 ሰዎች መሞታቸውን፣ 110 ሆቴሎች፣ 239 የመንግሥትና የግል መኖሪያ ቤቶች፣ 393 የግል መኖሪያ ቤቶች፣ 56 ሱቆች መቃጠላቸውንና መውደማቸውን መርማሪ ቡድኑ አስረድቷል፡፡ በተጨማሪም 148 ሱቆች መዘረፋቸውንና መሰባበራቸውን፣ 14 ፋብሪካዎች መቃጠላቸውን፣ 80 የግልና ሁለት የመንግሥት ተሽከርካሪዎች መቃጠላቸውን፣ 42 ባጃጆች፣ 18 የሞተር ብስክሌቶች፣ 63 የግል ድርጅቶች፣ አንድ የእምነት ተቋም፣ 26 የግል ሕንፃዎች መቃጠላቸውንና መውደማቸውን ዘርዝሯል፡፡ ዘጠኝ ወፍጮዎች መቃጠላቸውን፣ አራት የመንግሥትና የግል ባንኮች መዘረፋቸውን፣ በአጠቃላይ 1,128 አባወራዎች ከቀዬአቸው መፈናቀላቸውን የሚያረጋግጥ የሰነድ ማስረጃ መሰብሰቡን መርማሪ ቡድኑ ተናግሯል፡፡

Related stories   ሁለት የብሔራዊ መረጃና ደኅንነት አገልግሎት ሠራተኞች በሌብነት ተከሰሱ

መርማሪ ቡድኑ ለምርመራ የሰጣቸውን የኤሌክትሮኒክስ መሣሪያዎች የምርመራ ውጤት ማስረጃ ሰነድ መሰብሰቡን፣ አቶ በቀለ ከሌሎቹ ግብረ አበሮቻቸው ጋር በመሆን የድምፃዊ ሃጫሉን አስከሬን ከቡራዩ እንዲመለስና በኦሮሚያ ብልፅግና ፓርቲ ጽሕፈት ቤት እንዲገባ ማድረጋቸውን፣ በጽሕፈት ቤቱ ውስጥ በተደረገ የተኩስ ልውውጥ የፖሊስ ሕይወት መጥፋቱንና የአካል ጉዳት መድረሱን፣ አስክሬኑ ሳይቀበር ለአሥር ቀናት እንዲቆይና ከተለያዩ አካባቢዎች በሚመጡ ወጣቶች የምኒልክን ሐውልት በማፍረስ እዚያ እንደሚቀበርና የአራት ኪሎ መንግሥትን ለመፈንቀል ዕቅድ እንደነበራቸው የሚያስረዱ ጭብጥ ያለው የ27 ምስክሮች ቃል መቀበሉን መርማሪ ቡድኑ አስረድቷል፡፡

የፌዴራል ፖሊስ ወንጀል ምርመራ ቡድን በተሰጠው ስምንት ቀናት ውስጥ ከላይ የተገለጸውን የምርመራ ሒደት ማከናወኑንና የጊዜ ቀጠሮ ምርመራውን ማጠናቀቁን አስታውቆ፣ በወንጀለኛ መቅጫ ሥነ ሥርዓት ሕግ ቁጥር 80 እና ተከታዮቹ ቁጥሮች መሠረት የተቀበለውን የሰዎች የማስረጃ ቃል (ምስክርነት) በፍርድ ቤት ለማረጋገጥ በፌዴራል የመጀመርያ ደረጃ ፍርድ ቤት አራዳ ምድብ ችሎት የቀዳሚ ምርመራ መዝገብ መክፈቱን በማሳወቅ፣ የጊዜ ቀጠሮው መዝገቡ ተዘግቶ ወደ ቀዳሚ ምርመራ ችሎት እንዲቀርቡ ትዕዛዝ እንዲሰጥለት ፍርድ ቤቱን ጠይቋል፡፡

አቶ በቀለ ገርባ ያቆሟቸው ስድስት ጠበቆች ግን የመርማሪ ቡድኑን የመጨረሻ ጥያቄ ተቃውመዋል፡፡ ጠበቆቹ እንደገለጹት የደንበኛቸው የምርመራ መነሻ አቶ በቀለ ባስተላለፉት ስልክ ጥሪ የድምፃዊ ሃጫሉን አስከሬን ከመንገድ ላይ በማስመለስ በኦሮሚያ ብልፅግና ፓርቲ ጽሕፈት ቤት እንዲገባ አድርገዋል የሚል የነበረ ቢሆንም፣ የቀረበባቸው ምንም ማስረጃ እንደሌለ ገልጸዋል፡፡ በጥቅሉ የወደመን ንብረት በመጥቀስ የቅድመ ምርመራ መዝገብ እንደከፈተ አድርጎ መናገር፣ የቅድመ ምርመራን ዓላማ የማያሟላና ተገቢ ያልሆነ ጥያቄ መሆኑን አስረድተዋል፡፡ ቀዳሚ ምርመራ በዋና ምርመራ ወቅት የተገኘ አመላካች ነገር ሲገኝ የሚፈቀድ እንጂ፣ ስሜታዊ ሆኖ በተፈለገው ጉዳይ መዝገብ ዘግቶ ሌላ መዝገብ መክፈት ተገቢ እንዳልሆነና ማስረጃ ስለጠፋ ብቻ ቅድመ ምርመራ መክፈት የሕግ መሠረት እንደሌለው ተናግረዋል፡፡ ቅድመ ምርመራ ካስፈለገ መጀመርያውኑ መክፈት ይቻል እንደነበር ጠቁመው፣ አቶ በቀለ ከፍተኛ ፖለቲከኛና ሥራም ያለባቸው ሰው በመሆናቸው ፖሊስ መዝገቡን ዘግቻለሁ ስላለ ሕገ መንግሥታዊ የዋስትና መብታቸው ተጠብቆላቸው እንዲፈቱ ጠይቀዋል፡፡ ፖሊስ ባቀደው መሠረት ማስረጃ ስላጣ ከሕግ ውጪ ዋስትና ለማስከልከል ሌላ ምርመራ መጀመር እንደሌለበትም አክለዋል፡፡ አቶ በቀለ ከልጆቻቸው ጋር ለቅሶ ሄደዋል እንጂ ሌላ ያደረጉት ነገር የለም ብለዋል፡፡

Related stories   በሰብዓዊ መብት ጥሰትና በሙስና ወንጀል የተጠረጠሩ ከ60 በላይ ተጠርጣሪዎች ለ2ኛ ጊዜ ፍ/ቤት ቀረቡ

አቶ በቀለ ራሳቸው ለፍርድ ቤቱ ከመጀመርያው እንደተናገሩት፣ መንግሥት ፍርድ ቤትን እየተጠቀመ ተቀናቃኙን ለማጥፋት እየሠራ ነው፡፡ ‹‹እኔ ይህንን ሁሉ ልሠራ የሚያስችለኝ ሠራዊት የለኝም፡፡ ሕዝብ ሲብሰው ወይም ብሶት ሲሰማው በራሱ ይነሳና ዓለም እንዲያየው ያደርጋል፡፡ በዚህ ጊዜ ሁሉም መሪ ሁሉም ተከታይ ይሆናል፡፡ ያንን አመፅና ሁከት ራሱ ነው የመራው፡፡ በሻሸመኔ ተፈጽሟል ስለተባለው ነገር እንደዚያ የማድረግ ዕቅድም ታሪክም የለኝም፡፡ ይህ መንግሥት በሕዝብ ያልተመረጠ መንግሥት ነው፡፡ ምርጫ ይራዘም ሲል ምርጫ መራዘም እንደሌለበት በመግለጽ ሕዝብ ተቃውሞውን አሰምቷል፡፡ እኔም ከእነሱ ጋር ነኝ፡፡ በደጋፊዎቼና በፖለቲካ ፓርቲዬ ላይ ተፅዕኖ ለማሳደር የተሠራ ሥራ ነው፤›› ሲሉ ለፍርድ ቤቱ ገልጸዋል፡፡

በኢትዮጵያ በሙሉ የተሠራውን በእሳቸው ላይ መከመር ሙያዊ፣ ሥነ ምግባራዊ፣ ሕጋዊና ሞራላዊ አለመሆኑንም አክለዋል፡፡ የእሳቸው መታሰር አገርን የሚያረጋጋ ከሆነ ቆይቶ ወደፊት የሚታይ እንደሚሆንም ተናግረዋል፡፡ ለለቅሶ ከቤተሰቦቻቸው ጋር መውጣታቸውን ጠቁመው፣ ሕገ መንግሥታዊ የዋስትና መብታቸው እንዲከበርላቸው ጠይቀዋል፡፡

ዓቃቢያነ ሕጉ በሰጡት ምላሽ የጊዜ ቀጠሮ ችሎት ማስረጃ የመስማትና የመመዘን ሥልጣን እንደሌለው ገልጸው፣ ክርክር ማድረግም ተገቢ እንዳልሆነ ተናግረዋል፡፡ ጊዜ ቀጠሮ ችሎት መርማሪ ቡድኑ በተሰጠው ጊዜ ውስጥ ምን እንደሠራ ማረጋገጥና ተጠርጣሪ በምርምራ ሒደቱ ላይ ያለውን አቤቱታ ማድመጥ እንጂ፣ ክርክር ማድረግና ማስረጃ መመዘን የችሎቱ ሥራ እንዳልሆነም ዓቃቤያነ ሕጉ አስረድተዋል፡፡ የማስረጃውን ዓይነትና ይዘት ‹‹አልተገለጸልኝም›› ብሎ መጠየቅም ተገቢ እንዳልሆነም አክለዋል፡፡ ወንጀሉ ከተፈጸመበት ጊዜ አንፃር ምርመራው የተፋጠነ መሆኑን የገለጹት ዓቃቤያነ ሕጉ፣ ከሰኔ 25 እስከ ሐምሌ 28 ቀን 2012 ዓ.ም. ድረስ በአጭር ጊዜ ፖሊስ የምርመራ ሒደቱን ማጠናቀቁ በተገቢው ሁኔታ ሥራውን ማከናወኑን የሚያሳይ እንደሆነም ገልጸዋል፡፡

ቀዳሚ ምርመራውን በሚመለከት መርማሪ ቡድኑ ዝም ብሎ በራሱ የሚከፍተው ሳይሆን፣ የምርመራ መዝገቡ በዓቃቤ ሕግ ተመርምሮ ቀዳሚ ምርመራ እንደሚያስፈልግ ሲወስን እንደሚከፈትም ዓቃቤያነ ሕጉ አስረድተዋል፡፡

በወንጀለኛ መቅጫ ሥነ ሥርዓት ሕግ ድንጋጌ መሠረት የመጀመርያ ደረጃ ፍርድ ቤት አራዳ ምድብ ችሎት የቀዳሚ ምርመራ መዝገብ መከፈቱን አረጋግጠው፣ የመርማሪ ቡድኑ የምርመራ መዝገብ ተዘግቶ ትዕዛዝ እንዲሰጥላቸው ጠይቀዋል፡፡ አቶ በቀለ የተጠረጠሩበትና የሚከሰሱበት የወንጀል ሕግ 240 (2) እና የወንጀለኛ መቅጫ ሥነ ሥርዓት ሕግ ቁጥር 63 ድንጋጌ ደግሞ ከ15 ዓመት በላይ የሚያስቀጣ የወንጀል ድርጊት ዋስትና እንደሚከለከል በሕግ አውጭው አካል የተወሰነ በመሆኑ፣ የጠየቁት ዋስትና ተገቢ እንዳልሆነም ገልጸዋል፡፡

Related stories   ባለቤቱ ያልታወቀው የኦሮሚያ በፊንፊኔ/አዲስ አበባ ላይ ያለውን ልዩ ጥቅም ለመወሰን የወጣ አዋጅ (ረቂቅ)

የግራ ቀኙን ክርክር የሰማው ፍርድ ቤቱ የፌዴራል ፖሊስ ወንጀል ምርመራ ቡድን የምርመራ መዝገቡን እንዲያቀርብ፣ በተከራካሪ ወገኖች የቀረበውን የክርክር ሐሳብ መርምሮ ትዕዛዝ ለመስጠት ለሐሙስ ሐምሌ 30 ቀን 2012 ዓ.ም. ቀጥሯል፡፡

ታምሩ ጽጌ

እርዕስ ተቀይሯል

Subscribe to our newsletter!

[newsletter_form type=”minimal” lists=”undefined” button_color=”undefined”]

Leave a Reply

Your email address will not be published. Required fields are marked *