በሰኔ 22 ቀን 2012 ዓመተ ምህረት ከምሽቱ 3 ሰዓት አካባቢ በገላን ኮንዶሚኒየም አካባቢ አርቲስት ሃጫሉ ሁንዴሳ ሲገደል አብራው የነበረችው ላምሮት ከማል ዛሬ ፍርድ ቤት ቀርባለች።
መርማሪ ፖሊስ ግለሰቧ ከአርቲስት ሃጫሉ ግድያ ጋር ግኑኝነት አላት ብሎ በመጠርጠሩ በቁጥጥር ስር አውሏት ምርመራ እያደረገባት መሆኑ ይታወቃል።
ተጠርጣሪዋ ዛሬ በፌደራል የመጀመሪያ ደረጃ አራዳ ተረኛ የጊዜ ቀጠሮ ችሎት ቀርባ ጉዳይዋ ታይቷል።
መርማሪ ፖሊስ የጂ ፒ ኤስ ቴክኖሎጂ ምርመራ ውጤትን እየተጠባበቀ መሆኑን ገልፆ በተጠርጣሪዋ እጅ ላይ የተገኘ የስልክ ልውውጥ እና የመልዕክቶችን ማስረጃ እየመረመረ መሆኑን ለችሎቱ አስረድቷል።
በርካታ ሰነዶች መሰበሰቡንና ይህም በፖሊስ እጅ እንደሚገኝ ጠቅሶ የምርመራ መዝገቡን አቃቤ ህግ ወስዶ እየተመለከተው መሆኑንም ጠቅሷል።
ይሁንና ቀሪ የምርመራ ስራዎችን ለማከናወን ከብሄራዊ የመረጃ እና ደህንነት አገልግሎት የሰነድ ማስረጃ ለመሰብሰብ ተጨማሪ ጊዜ ጠይቋል።
ችሎቱ ከወንጀል ድርጊቱ ጋር ምን የሚያገናኛት ነገር አለ ብሎ መርማሪ ፖሊስን የጠየቀ ሲሆን፥ መርማሪ ፖሊስ ለችሎቱ ብንገልፅ ማስረጃ ይሰወርብናል ብለን እናምናለን፣ ምርመራው በጥንቃቄ የሚከናወን ነው ሲል አስረድቷል።
ተጠርጣሪዋ ላምሮት ከማል በበኩሏ ገዳዩቹን ከሰው መሃል ለይቼ አሳይቻለሁ፣ ፎቶም ተነስቼያለሁ፣ የስልክ ምርመራው ከቴሌ ነው የሚመጣው፣ ትልቅ ተቋም ነው፣ ይህንን ማስድረጃ ላጠፋ አልችልም፣ የእናቴ እና አህቴ ሆቴል ዝግ ነው፥ ስለዚህ ቤተሰቦቼ ስለተቸገሩ የዋስ መብቴን ፍርድ ቤቱ ያስጠብቅልኝ፣ በተፈለገ ሰዓት መቅረብ እችላለሁ ስትል የዋስትና ጥያቄ አቅርባለች።
መርማሪ ፖሊሰም ከብሄራዊ መረጃና ደህንነት አገልግሎት የተጠየቁ ማስረጃዎች እየተጠባበቅን ነው፣ ምርመራው በጥንቃቄ የሚከናወን መሆኑን ተከትሎ ተጨማሪ የመርመራ ጊዜ ይፈቀደልኝ ሲል ጠይቋል።
ጉዳዩን የተከታተለው ፍርድ ቤቱም ምርመራውን አጠናቆ በቀጣይ የምርመራ ጊዜ መዝገብ ይዞ እንዲቀርብ የስድስት ቀናት ጊዜ ፈቅዶለታል።
በተያያዘ ዜና ግንቦት 17 ቀን 2012 ዓመተ ምህረት በጥቁር አንበሳ ሆስፒታል የቤተ ሙከራ ክፍል ተማሪ ሃይማኖት በዳዳን በመግደል ወንጀል ተጠርጥሮ በቁጥጥር ስር የዋለው እና የእምነት ክህደት ቃሉን ገድያለሁ ብሎ የሰጠው ደግነት ወርቁ በዚሁ ችሎት በሌላ መዝገብ ቀርቧል።
መርማሪ ፖሊስ በርካታ ሰነድ ማሰባሰቡን ገልፆ ከእሱ ጋር የተጠረጠረው ምህረቱ ሚጣ የተባለ ግለሰብ በኮቪድ-19 የህክምና ማቆያ እንደሚገኝ አብራርቷል።
ከወንጀሉ ጋር ግኑኝነት አላቸው በተባሉ የሆስፒታሉ የጥበቃ ሰራተኞች ላይ መርመራ እያደረገ መሆኑንም ጠቅሷል።
ከቴሌ የተገኘው የስልክ ልውውጥ ሙያዊ ትንተና በመፈለጉ፣ የሰነድ ማስረጃ እያሰባሰበ በመሆኑ፣ ክስ ለመመስረት አስፈላጊ ናቸው የተባሉ ሰነዶች እያሰባሰበ እና በእጁ ላይ የተገኙ ቼክ፣ ፅሁፍና ፊርማ የመለየት ስራ እያከናወነ መሆኑን ጠቅሶ ተጨማሪ የምርመራ ጊዜ ጠይቋል።
ተጠርጣሪው የሰብዓዊ መብት ጥሰት ደርሶብኛል ብሎ ከዚህ በፊት ባቀረበው አቤቱታ ላይ የሰብዓዊ መብት ኮሚሽን ተወካይ ቀርቦ እንዲያብራራ ታዞ የነበረ ሲሆን፥ የቀረበው ተወካይ ተእዛዙ ዘግይቶ ስለደረሰኝ በሌላ ቀን ሪፖርቱን አንዳቀርብ ሲል ተለዋጭ ቀጠሮ ጠይቋል።
ተጠርጣሪው በበኩሉ ተደጋጋሚ ቀጠሮ መሰጠቱ አግባብነት የለውም ሲል ተቃውሟል።
ጉዳዩን የተከታተለው ፍርድ ቤቱም መርማሪ ፖሊስ ምርመራውን አጠናቆ እንዲቀርብ የ10 ቀን ጊዜ ፈቅዷል።
በታሩክ አዱኛ
FBC report
Related stories   የሶማሌ ክልል የቀድሞው ፕሬዚዳንት አቶ አብዲ መሐመድ ከእስር ቤት ለማምለጥ ሞክረዋል – ፖሊስ

Leave a Reply

Your email address will not be published. Required fields are marked *