የኢትዮጵያን የአየር ሃይል ብቃት እኛ ከምናውቀው በላይ እነሱ ጠንቅቀው ያውቁታል፤ ስለወደዱን ወይም አቋማችንን ስለተቀበሉ ሳይሆን ሁኔታዎች ወዴት ሊሄዱ እንደሚችሉ ጠንቅቀው ስለሚያውቁም ጭምር የሚፈጠር ጉዳይ አይኖርም
 
የኢፌዴሪ አየር ሃይል ዋና አዛዥ ሜጀር ጀነራል ይልማ መርዳሳ እንደተናገሩት የፕሬዝዳንት ትራምፕ ንግግር ሃገርን እመራለሁ ከሚል መሪ የሚጠበቅ አይደለም፤ የአንድን ሃገር ሉዓላዊነት በንግግርም ቢሆን መጣስ ከባድ ጥፋት በመሆኑ ይህንን ተከትሎ ሊመጣ የሚችል ማንኛውንም አይነት ጥቃት ለመመከት አየር ሃይሉ ሙሉ ዝግጁነት አለው ብለዋል።
ዋና አዛዡ እንዳሉት ለፕሬዝዳንቱ ንግግር የሃገር መሪዎችና ዲፕሎማቶች በዲፕሎማሲው መድረክ መልስ እንደሚሰጡ ሁሉ፤ አየር ሃይሉ ደግሞ ፕሬዝዳንቱ ለጎሰሙት የጦርነት ነጋሪት አስፈላጊውን መልስና ርምጃ ይወስዳል፡፡
“ከአባይ ወንዝ ጋር በተያያዘ ጭቅጭቅ እያነሱ ያሉ አካላት ከ 2 ሺህ ኪሎ ሜትር በላይ ተጉዘው በእግረኛ ጦር ይዋጋሉ ብለን አናስብም፤ በመሆኑም ወደ ግጭት ከተገባም ግጭቱ በቀጥታ ከአየር ሃይል ጋር እንደሆነ እናውቃለን፤ በዚህ ደረጃ እነሱ ምንድን ነው ያላቸው? የመሳሪያ ቴክኖሎጂያቸው፤ የሰው ሃይል ብቃት እና የስልጠና ደረጃቸው ምን ይመስላል? የሚለውን ለይተን እናውቃለን፤ ከዚህም ባሻገር 24 ሰዓት ዓይናችን የህዳሴው ግድብ ላይ ነው” ብለዋል አዛዡ።
የኢትዮጵያን የአየር ሃይል ብቃት እኛ ከምናውቀው በላይ እነሱ ጠንቅቀው ያውቁታል፤ ስለወደዱን ወይም አቋማችንን ስለተቀበሉ ሳይሆን ሁኔታዎች ወዴት ሊሄዱ እንደሚችሉ ጠንቅቀው ስለሚያውቁም ጭምር የሚፈጠር ጉዳይ አይኖርም ያሉት ሜጀር ጀነራል ይልማ፤ አየር ሃይሉም ለ24 ሰዓታት ለሰባት ቀናት ዝግጁ መሆኑን አረጋግጣለሁ ብለዋል።
ታላቁ የኢትዮጵያ ህዳሴ ግድብ የኢትዮጵያ ህዝብ ከሌለው ሀብት ላይ ቆጥቦ እየገነባው ያለው ፕሮጀክቱ በመሆኑ ከፍተኛ ትኩረት የሚሻ ቢሆንም አየር ሃይሉ የሃገሪቷን መሰረተ ልማቶች፣ የፖለቲካ የኢኮኖሚ እንዲሁም ወታደራዊ ማዕከሎችን በንቃት እንደሚጠብቅም መገልፃቸውን የኢትዮጵያ ፕረስ ድርጅት ዘግቧል።
Related stories   አብይ አህመድ አስጠነቀቁ - ነጻነት ሀገወጥ መሆን አይደለም

Leave a Reply

Your email address will not be published. Required fields are marked *