ሜ/ጀነራል ገብረመድህን ፈቃዱ ወይም በቅጽል ስሙ ወዲ ነጮ የተባለው ተጠርጣሪ በአገር ክህደት ወንጀል ከነ 17 ግብረ አበሮቹ በመከላከያ ሰራዊታችንና በፌዴራል ፖሊስ ኮሚሽን በቁጥጥር ስር ዋለ ።
የሰሜን ዕዝ ከማዕከል ጋር የሚኖረው የመገናኛ ሥርዓት እንዲቋረጥ በማድረግ በጁንታው የህዋሃት የጥፋት ቡድን ጥቃት እንዲፈፀምበት ሲያመቻቹ የነበሩ ጀነራል መኮንኖች ከነ ግብረ አበሮቹ በቁጥጥር ሥር ዋሉ።
የፌደራል ፖሊስ ኮሚሽን እንዳስታወቀው ፣ በመንግስት፣ በህዝብና በሀገር መከላከያ ሠራዊት የተጣለባቸውን አደራና ኃላፊነት ወደ ጎን በመተው ፣ የጁንታው ህወሃት ሴራ አካል በመሆን የአገር ክህደት ወንጀል በመፈጸም የተጠረጠሩ ጀነራል መኮንኖች ፣ ከፍተኛ ወታደራዊ መኮንኖችና የበታች ሹማምንቶች በቁጥጥር ሥር ውለዋል ።
በሀገር መከላከያ ሠራዊት አባል ሆነው ከጁንታው ህወሃት ጋር በመጣመር ጥቅምት 24 ቀን 2013 ምሽት ላይ በትግራይ ክልል የሚገኘው የሰሜን ዕዝ ከማዕከል ጋር የሚኖረው ግንኙነት ሙሉ ለሙሉ እንዲቋረጥና ፣ የዕዙ የመገናኛ ሥርዓት ለጁንታው የህዋሃት ወንበዴው ቡድን እንዲመቻች በማድረግ የተጠረጠረው ሜ/ጀ ገብረመድህን ፈቃዱ ወይም በቅጽል ስሙ ወዲ ነጮ የተባለው ተጠርጣሪ ፣ በአገር ክህደት ወንጀል ከነ ግብረ አበሮቹ በሀገር መከላከያ ሰራዊትና በፌደራል ፖሊስ ኮሚሽን በቁጥጥር ሥር እንዲውሉ ተደርጓል።
የአገር ክህደትን በመፈጸም በዋነኛነት የተጠረጠረው ሜ/ጀ ገብረመድህን ፍቃዱ ፣ ከለውጡ በፊት በአገር መከላከያ ሠራዊት የአጋዚ ኮማንዶና ልዩ ኃይሎች አዛዥ የነበረ ሲሆን ፣ በሰራዊት ውስጥም በተለያዩ የሥራ እርከኖች አገልግሏል ።
ለውጡን ተከትሎም በአገር መከላከያ ሰራዊት የመገናኛ ዋና መምሪያ ሃላፊ በመሆን ሲሰራ ነበር ፡፡
ይሁንና ከመንግስት ፣ ከህዝብና ከአገር መከላከያ ሰራዊት የተጣለበትን ከባድ አደራና ሃላፊነት አገር ለማፍረስና ለማተራመስ ከሚንቀሳቀሰው የጁንታው የህዋሃት የሴራው አካል በመሆን የሰሜን እዝ ከማዕከል ጋር ያለው ግንኙነት እንዲቋረጥና በከሃዲዎች ጥቃት እንዲፈፀምበት ከማድረጉም በላይ ፣ በውስጣቸው ቦንቦችና የሚሳኤል መሳሪያዎችን የያዙ 11 ሳጥኖች የግንኙነት መሳሪዎች ናቸው በሚል ሽፋን ወደ ትግራይ የጁንታው ቡድን ለመላክ ሲዘጋጅ ከተለያዩ የጦር መሳሪያዎች ጋር እጅ ከፍንጅ መያዙን የፌደራል ፖሊስ ኮሚሽን አመልክቷል ።
የሀገር መከላከያ ሰራዊትና የፌደራል ፖሊስ ኮሚሽን ባደረጉት ጠንካራ ክትትልና ባካሄዱት ኦፕሬሽን ፣ ተጠርጣሪው ሜ/ጀ ገብረ መድህን ፈቃዱን ጨምሮ ሌሎች ጀነራል መኮንኖች ፣ ከፍተኛ ወታደራዊ መኮንኖችና የበታች ሹማምንቶቻቸው በድምሩ 17 ተጠርጣሪዎች በቁጥጥር ስር ውለዋል ።
በቀጣይም ከጁንታው የህዋሃት የጥፋት ቡድን አገር የማተራመስና የማፍረስ ሴራ እንዲሁም ፣ በአገር ክህደት ወንጀል የተሳተፉትንና በየትኛውም የኃላፊነት ደረጃና መዋቅር ላይ ያሉ ተጠርጣሪዎችን ተከታትሎ በህግ ተጠያቂ እንዲሆኑ የማድረግ ስራው ተጠናክሮ እንደሚቀጥል የፌደራል ፖሊስ ኮሚሽን ገልጿል።
FBC (Fana Broadcasting Corporate S.C.)

Share and Enjoy !

Shares
Related stories   ደመቀ መኮንን በፊንላንድ የውጭ ጉዳይ ሚኒስትር ከሚመራ የአውሮፓ ህብረት ልዑክ ጋር ተወያዩ

Leave a Reply

Your email address will not be published. Required fields are marked *