Share and Enjoy !

0Shares
0
– በአዲስ አበባ ማስክ የሚጠቀሙ ሰዎች ቁጥር ከ72 በመቶ ወደ 52 በመቶ ማሽቆልቆሉ ተገልጿል።
በርካታ አገራት የኮሮና ቫይረስ ክትባትን ለዜጎቻቸው ለመስጠት የተለያዩ ጥረቶችን በማድረግ ላይ ሲሆኑ እንግሊዝ በያዝነው ሳምንት ሰኞ ክትባት መስጠት ጀምራለች።
አሜሪካም ከዛሬ ጀምሮ ለአዛውንቶች እና ለህክምና ባለሙያዎች ክትባቱን እንደምትሰጥ ሲኤንኤን ዘግቧል።
ኢትዮ ኤፍ ኤም ኢትዮጵያስ የቫይረሱን ክትባት ወደ አገር ውስጥ ለማስገባት ምን እየሰራች ነው ክትባቱስ ለዜጎቿ ከመቼ ጀምሮ መሰጠት ይጀመራል ሲል የጤና ጥበቃ ሚኒስቴርን ጠይቋል።
የጤና ጥበቃ ሚንስትር ዶክተር ሊያ ታደሰ እንዳሉት የኮሮና ቫይረስ ክትባት ለማግኘት የሚያስችለንን በጤና ሚኒስቴር የሚመራ ግብረ ሀይል አቋቁመን ዝግጅት እያደረግን ነው ሲሉ ተናግረዋል።
መጀመሪያ የሚከተቡና ቅድሚያ የሚሰጣቸው የህብረተሰብ ክፍሎችን መለየት ላይ እንሰራለን ነው ሲሉም ሚኒስትሯ አክለዋል።
ክትባቱ ወደ አገር ውስጥ ከገባ በኋላም የጸጥታ ሀይሎች፣ እድሜያቸው የገፉ ሰዎች እና መምህራን ቅድሚያ ተሰጥቷቸው የሚከተቡ ናቸው ብለዋል።
ክትባቱ ከመጣም በኋላ በጤና ስርአቱ ተጠብቆ ወደ ህብረተሰቡ ለማድረስ ስራም ይሰራል ብለዋል ዶክተር ሊያ።የአለም ባንክም ድጋፍ እንዲያደርግ ጠይቀናል ሲሉም አክለዋል።
አሁን ላይም ስለ ክትባቱ በቂ መረጃ ለህብረተሰቡ ለመስጠት የምንጀምረው ስራ ነው ተብሏል።
በተያያዘ ዜና በኢትዮጵያ የኮሮና ቫይረስ ዙሪያ ያለው መዘናጋት ከቀጠለ ካለን የጽኑ ህሙማን ክፍል አንጻር አሳሳቢ መሆኑንም ሚንስትሯ ተናግረዋል።
በአዲስ አበባም ይሁን በክልል ከተሞች እየታየ ያለው መዘናጋት ከቀጠለ የጽኑ ህሙማን የምናስተኛበት ቦታ ላይበቃን ይችላል ብለዋል።
ይሄም አሳሳቢ ሆኖብናል ያሉት ሚንስትሯ የማስክ አጠቃቀምን በተመለከተ በየሳምቱ ሚኒስቴር መስሪያ ቤቱ ጥናት ያደርጋል ብለዋል።
በዚህም ከሰኔና ሀምሌ ወር ባጠናነው ጥናት መሰረት አዲስ አበባ 75 በመቶ ህብረተሰቡ ማስክ ይጠቀም ነበር አሁን ላይ ግን ወደ 52 በመቶ ወርዷል።
በተመሳሳይም በክልል ከተሞች የማስክ አጠቃቀም ቀንሷል ሲል አክለዋል
ሜካኒካል የመተንፈሻ መሳሪያ ላይ ያሉ ህሙማን ቁጥር እየጨመረ እንደሆነ ተገልጿል።
እስካሁን ባለው መረጃ በኢትዮጵያ 1 ነጥብ 6 ሚሊየን ሰዎች የኮሮና ቫይረስ ምርመራ የተደረገላቸው ሲሆን 114 ሺህ በላይ ሰዎች ቫይረሱ እንደተገኘባቸው ከሚኒስቴሩ ያገኘነው መረጃ ያሳያል።
በሳሙኤል አባተ
ታህሳስ 1 ቀን 2013 ዓ.ም
Via FM 107.8

Leave a Reply

Your email address will not be published. Required fields are marked *