“Our true nationality is mankind.”H.G.

በአዲስ አበባ ከተማ ከ13 ሚሊዮን ካሬ ሜትር በላይ የሆነ ቦታ በህገ ወጥ መንገድ ተወርሯል፡- የከተማ አስተዳደሩ

በአዲስ አበባ ከተማ አስተዳደር በሚገኙ 121 ወረዳዎች 13 ሚሊዮን 523 ሺህ 634 ካሬ ሜትር ቦታ በህገ ወጥ መንገድ መወረሩ ተጠቆመ።
የአዲስ ሚዲያ ኔትወርክ ‘የመሬት ቀበኞች’ በሚል ባዘጋጀው ዶክመንታሪ ፊልም ጠቅሶ ኢዜአ እንዳመለከተው፤ ከለውጡ ማግስት ጀምሮ ቀዝቀዝ ብሎ የነበረው የመሬት ወረራ እንደ አዲስ አገርሽቶ እየተስፋፋ መጥቷል።
ህገ ወጥነቱ በሁሉም ክፍለ ከተማ ያለ ሲሆን ችግሩ በስፋት የሚታይባቸው ቦሌ፣ የካ፣ ንፋስ ስልክ ላፍቶ፣ አቃቂ ቃሊቲና ጉለሌ እንደሆኑም ተመላክቷል።
በአዲስ አበባ ከተማ አስተዳደር በተደረገ ጥናት እንደተረጋገጠው በ121 ወረዳዎች 13 ሚሊዮን 523 ሺህ 634 ካሬ ሜትር ቦታ በህገ ወጥ መንገድ ተወርሯል።
በድርጊቱ የሪል ስቴት አልሚዎችና የሃይማኖት ተቋማት በዋናነት እንደተሳተፉም ተጠቁሟል።
በሪል ስቴት አልሚዎች 184 ሺህ 208 ካሬ ሜትር ቦታ እንዲሁም በሃይማኖት ተቋማት ደግሞ ከ97 ሺህ ካሬ ሜትር በላይ የሆነ ቦታ በህገወጥ መንገድ ተይዟል።
በህገ ወጥ መንገድ በተመሰረቱ 64 መንደሮች 6 ነጥብ 8 ሚሊዮን ካሬ ሜትር ቦታ የተወረረ ሲሆን 1 ነጥብ 3 ሚሊዮን ካሬ ሜትር ባዶ ቦታ መሬት በህገ ወጥ መንገድ ታጥሮ መገኘቱን አመልክቷል።
የአዲስ አበባ ከተማ አስተዳደር ምክትል ከንቲባ ወይዘሮ አዳነች አቤቤ በዚህ መጠን ችግሩ መስፋፋቱ የመሬት ወረራ የቆየ፣ የከረመና ስር የሰደደ ችግር መሆኑን እንደሚያሳይ ገልጸዋል።
መሬት ወረራ ላይ የሚሳተፈው አካል ብዙ መሆኑን ጠቅሰው፤ ችግሩ በዋናነት የሚጀምረው ከመንግስት ተቋም እንደሆነ አመልክተዋል።
“የመንግስት የስራ ሃላፊዎች፣ የመንግስት ሰራተኞች፣ ከእነሱ ጋር ግንኙነት ያላቸው ደላሎች፣ ባለሃብቶች፣ እንዲሁም የእምነት ተቋማት፣ አንዳንድ ጊዜ ደግሞ የመንግስት መስሪያ ቤቶች ጭምር” በማለት የህገወጥ ድርጊቱ ተሳታፊዎች በርካታ መሆናቸውን አመላክተዋል።
የመሬት ወረራ በስፋት የተካሄደባቸው ወቅቶች መንግስት በተለያየ ምክንያት ውጥረት ውስጥ የገባበት ጊዜ መሆኑን የጠቀሱት ምክትል ከንቲባዋ፤ ሁከት፣ ምርጫና ሌላ መንግስት ጫና የገባበት ጊዜ ሰፋ ያለ የመሬት ወረራ እንደተካሄደበት ገልጸዋል።
በዚህ አጋጣሚ መሬትን በመውረር ብዙዎች ትልልቅ ሃብት ማፍራታቸውን የጥናት ግኝት እንደሚያሳይ ገልጸዋል።
በአቋራጭ ሃብት አግኝቶ መሬትን እያገላበጡ መሸጥ ትልቅ ችግር መሆኑን ገልጸው፤ “መሬት እየለማ ከሆነ ችግር አይደለም” ብለዋል።
የመሬት ወረራ ሲፈጸም ህዝቡ ህገ ወጥነት እንዲስፋፋ ሽፋን ከመስጠት መጠንቀቅ እንዳለበትም አሳስበዋል።
“በተለይ ከብሔርና ከማንነት ጋር ተያይዞ ሽፋን መስጠት ህገ ወጡ መደበቂያ እንዲያገኝ ማድረጊያ አንዱ ስልት ነው” ብለዋል።
ህገወጥነትን ማጥፋትና ማስተካከል እንደሚቻል ጠቁመው፤ “ህገወጥነት እንዳያጠፋን መጠንቀቅ አለብን፤ ነዋሪው አሁን በጀመረው ደረጃ ያግዘን” ሲሉ ጥሪ አቅርበዋል።

Share and Enjoy !

Shares
Related stories   “የግድቡ ግንባታ ውሃ ይቀንስብኛል የሚለው የግብጽ ጩኸት የማጭበርበሪያና የተለመደ የሃሰት ክስ ነው››
0Shares
0