“Our true nationality is mankind.”H.G.

አቶ ኢሳያስ ዳኛው በ50 ሺህ ብር ዋስ ከእስር እንዲለቀቁ ተፈቀደ

መርማሪ ፖሊስ በትናትናው ዕለት በኢትዮ-ቴሌኮም የኤን ፒ ጅኦ ኃላፊ ሆነው በሚሰሩበት ወቅት ኢዲኤም ከተባለው አማካሪ ድርጅት ጋር የስራ ማማከር ውል ያለጨረታ ተዋውለዋል፤ በዚህም መሰረት 12 ለሚሆኑ ከኢዲኤም ለመጡ አማካሪዎችና ለድርጅቱ ሰራ አስኪያጅ በሰዓት ከ125-150 ዶላር በሳምንት ደግሞ ለስድስት ቀን ወይም ለ44 ሰዓት ከ2001 ዓ.ም ጀመሮ እስከ 2005 ዓ.ም ያለአግባብ ክፍያ ፈጽመዋል።

እንዲሁም ለስራ አስኪያጇ ከ500 ሺህ ብር በላይ የቤት ኪራይ እንዲከፈል አድረገዋል፤ ከአማካሪ ድርጅቱ ጋር የተደረገው ውል ከህግና መመሪያ ውጭ እንዲሻሻል ተደርጓል።

በተጨማሪም በውሉ ላይ እንዲሰሩ የተገለጹ ስራዎች በውሉ መሰረት መሰራታቸው ሳይረጋገጥ 104 ሺህ 495 ዶላር ክፍያ ተፈጽሟል በሚል በሙስና ወንጀል እንደሚጠረጥራቸው ለፍርድ ቤቱ በማስረዳት በተጠርጣሪው ላይ በተከፈተው አዲስ የምርመራ መዝገብ ላይ ተጨማሪ የሰውና የሰነድ መረጃዎችን ለማሳባሰብ የ14 ቀን የምርምራ ጊዜ እንዲፈቀድለት ፍርድ ቤቱን ጠይቆ ነበር።

የተጠርጣሪው ጠበቆችም በበኩላቸው 93 ቀን በእስር ቤት ቆይተው የዋስትና መብታቸውን ሊያስከብሩ ጉዳዩ ባለቀ ሰዓት አዲስ የምርመራ መዝገብ መቅረቡ ተገቢ አለመሆኑን ለፍርድ ቤቱ በማስረዳት ፍርድ ቤቱ ተገቢውን ውሳኔ እንዲሰጥ ጠይቀዋል።

ፍርድ ቤቱም በዛሬው እለት በዋለው ችሎት የግራ ቀኙን ክርክር በመመልከትና መዝገቡን መርመሮ በዋለው ችሎት አቶ ኢሳያስ ዳኛው በ50 ሺህ ብር ዋስ እንዲወጡና ከሀገር እንዳይወጡ ለኢሚግሬሽን እግድ ይጻፍ በማለት ውሳኔ ማሳለፉን ከፌደራል ጠቅላይ አቃቤ ህግ ያገኘነው መረጃ ያመለክታል።

Share and Enjoy !

0Shares
0
0Shares
0