የምዕራብ ወለጋውን ጭፍጨፋ የመራውና ያደራጀው ትህነግ መሆኑንን የኦሮሚያ ፖሊስ ኮሚሽን አረጋገጠ፤ በቁጥጥር ስር የዋሉ አሉ

በምዕራብ ወለጋ ዞን ጉሊሶ ወረዳ ጋዋ ቃንቃ ቀበሌ በተፈጸመው ጥቃት ህይወታቸው ያለፉ ሰዎች ቁጥር ሰላሳ ሁለት እንደሆነ የገለጹት

የኦሮሚያ ፖሊስ ኮሚሽን ኮሚሽነር ጄኔራል አራርሳ መርዳሳ ናቸው። ኮሚሽነሩ  ዛሬ ማምሻውን ለኢቢሲ እንዳሉት፤ በጥቃቱ የተነሳ የተፈናቀሉ 200 ያህል አባወራዎችን ናቸው።

የዞኑ አስተዳደር ለአማራ ቲሌቪዥን እንዳሉት ጥቃት አድራሺዎቹ ከብት በመጠበቅና እርሻቸው ላይ የነበሩ ሰላማዊ ሰዎችን ስብሰባ ጠርተው ጥድ ዛፍ ስር ከሰበሰቡ በሁዋላ ነው የገደሏቸው። ግድያው እጅግ ዘግናኝ ሲሆን ሕዝብ እንዲያየው ቀረጻው ሲጠናቀቅ አየር ላይ እንዲውል እንደሚላክ አስታውቀዋል።

መኖሪያ ቢቶችን፣ የሰብል መጠበቂያ ማማዎችን፣ በጎተራ ያለ እህል በእሳት ያጋዩት ወንበዴዎች 800 የሚሆኑ ክብቶችና ክብቶቹን እንዲነዱ አስር የሚጠጉ ሰዎችን አግተው መውሰዳቸውን አስተዳዳሪው አመልክተዋል።

በተፈጸመው ጥቃት 23 ወንድና 9 ሴቶች በድምሩ 32 ሰዎች ህይወታቸው ማለፉን የገለጹት ኮሚሽነር ጄኔራሉ፤ 10 ሰዎች ጉዳት ደርሶባቸው ህክምና እየተከታተሉ እንደሚገኙ አመልክተዋል።

በጥቃቱ የመኖሪያ ቤቶችና አንድ ትምህርት ቤት እንደተቃጠለ ተናግረው፤ ከአካባቢው ህብረተሰብ ጋር በመተባበር መልሶ የማቋቋም ስራ መጀመሩን ገልጸዋል።

የጥቃት ድርጊቱን የፈጸመው አካል ኦነግ ሸኔ መሆኑን ገልጸው፤ ከጀርባ በመሆን የህዝባዊ ወያኔ ሃርነት ትግራይ (ህወሃት) እየደገፈው እንደሚገኝ ተናግረዋል።

በተለይም ቡድኑ የታጠቃቸው እንደ ስናይፐርና ብሬል ያሉ የጦር መሳሪያዎች ህወሃት ያስታጠቀው እንደሆነ ገልጸዋል። ከኦነግ ጀርባ በመሆን ህወሃት በህብረተሰቡ ላይ ጥፋት እያደረሰ እንደሆነም ገልጸዋል።

ጥቃት የተፈጸመበት ቀበሌ ከወረዳ ከተማ በ75 ኪሎ ሜትር የሚርቅ መሆኑን ገልጸው፤ ህወሃት በብሔሮች መካከል ግጭት ለመፍጠር በስሌት የፈጸመው ተግባር ስለመሆኑ ማረጋገጫ መኖሩን ተናግረዋል። ትህነግ ይህ ከሆነ በሁዋላ አስቀድሞ ለክልሉ ህዝብ ራስህን አዘጋጅ የሚል ጥሪ በዶክተር ደብረጽዮን አማካይነት ተላልፏል።

ከድርጊቱ ፈጻሚዎች መካከል የተወሰኑት መያዛቸውን ያመለከቱት ኮሚሽነር ጀነራሉ  ቀሪዎቹን ለመያዝ አሰሳው ቀጥሎ  እንደሚገኝ ገልጸው፤ ተመሳሳይ ጥቃት እንዳይፈጸም ከህብረተሰቡ ጋር እየተሰራ መሆኑን ተናግረዋል።

የመከላከያ ሰራዊት፣ የኦሮሚያ ልዩ ሃይልና የፌደራል ፖሊስ በሶስት አቅጣጫ ከበባ አድረገው ወንበዴዎቹን እያሰሱ መሆኑንን መንግስት አስታውቋል።

የአማራ ክልል፣ የፌዴሬሽን ምክር ቤት፣ የኦሮሚያ ክልልና ጠቅላይ ሚኒስትር አብይ ” ይህንን ተጋባር ከሚፈጽምና ከሚያስፈጽም ቡድን ጋር በዚህ መልኩ መቀጠል ስለማይቻል በቃ ሊባል ይገባል” ለሚለው የህዝብ ጥያቄ መልስ ለመስጠት ዝግጁ መሆናቸውን የሚያመላክት መግለጫ በየፊናቸው አውጥተዋል።